Arhımed Muhambetov: «Serpinniń» túlekterine barlyq jaǵdaı jasalady
Qostanaı oblysynyń ákimi Arhımed Muhambetov aıtqandaı, mundaı aýqymdy shara óńirde tuńǵysh ret uıymdastyrylyp otyr. Sharaǵa barlyq aýdan-qalalardyń ákimderi qatysty.
«Elbasynyń bastamasymen jas mamandardy jumysqa ornalastyrý boıynsha kóptegen memlekettik baǵdarlamalar qabyldandy. Solardyń ishinde jemisti júzege asyp kele jatqany - «Dıplommen aýylǵa!». Osy ýaqytqa deıin atalmysh baǵdarlama arqyly óńirge 4310 jas maman keldi. Olardy jumysqa ornalastyrýǵa, júrip-turýyna 4 mlrd 700 mln teńge qarajat jumsaldy. Mine, osy sııaqty irgeli memlekettik baǵdarlamalardyń tetikterin túsindirý úshin bos oryndar jármeńkesin ótkizdik», - dedi aımaq basshysy.
Vakansııalar jármeńkesi ortalyqtan shalǵaı ornalasqan eldi mekenderge maman tartý maqsatynda júzege asyrylyp jatyr.
«Bıyl Qostanaı oblysynda 700 túlek «Serpin» baǵdarlamasymen bilimin aıaqtaıdy. Biz bul túlekterge turaqty jumys ornyn taýyp berýdi mindetimizge alamyz. Árbir aýdan-qalanyń ákimderine tapsyrma berdim. Tıisinshe, túlekter memlekettiń qoldaýyn sezinip, bilikti maman bolýǵa umtylýy qajet», - dep atap ótti Arhımed Muhambetov.
Búginde Qostanaı oblysynda 1200 bos oryn bar. Aýyl sharýashylyǵy, densaýlyq saqtaý, bilim berý, sáýlet, turǵyn úı-kommýnaldyq sharýashylyǵy, jer qatynastary salalary boıynsha mamandar tapshy.
Máselen, Fedorov aýdanyna 88 maman kerek. Onyń ishinde, memlekettik qyzmetke -17, densaýlyq saqtaý salasyna - 9, bilim berý salasyna 30 qyzmetker izdestirilýde.
«Men «Serpin» baǵdarlamasy arqyly Qyzylorda oblysynan keldim. Bıyl oqýymdy aıaqtap, Sarykól aýdanyna jumysqa turýdy josparladym. Búgingi bos oryndar jármeńkesinen aýyl sharýashylyǵy salasynan jumys taptym. Jergilikti bılik ókilderi tıisti áleýmettik paket usyndy», - deıdi JOO túlegi Rınat Saqtaǵanov.