Arhımed Muhambetov Memleket basshysynan alǵys aldy

QOSTANAI. QazAqparat - Qostanaı oblysynyń ákimi Arhımed Muhambetov QR Prezıdenti Nursultan Nazarbaevtan alǵys hat aldy, dep habarlaıdy QazAqparat oblystyq Іshki saıasat basqarmasyna silteme jasap.

Elbasy Arhımed Muhambetov pen barsha Qostanaı oblysynyń turǵyndaryn Astananyń 20 jyldyǵymen quttyqtady.

«Táýelsiz Qazaqstannyń sımvoly sanalatyn bas qalamyzdyń aıtýly mereıtoıy - barsha qazaqstandyqqa ortaq qýanysh. Saryarqa tósine qazyǵyn qaqqan eńseli elordamyzdy turǵyzýǵa búkil halqymyz jumyla atsalysty. «Óńirlerdiń Astanaǵa tartýy» jobasy aıasynda Qostanaı oblysy da elordaǵa erekshe syı jasady. Uzaq qashyqtyqty qamtıtyn jáne tolyq jabdyqtalǵan velosıped jolaǵy adamdarǵa arnalǵan qaladaǵy zamanaýı ortanyń mańyzdy quramdas bóligi sanalady. Bul velosıped jolaǵy salamatty ómir saltyn nasıhattap, elordada jappaı sportpen shuǵyldaný úrdisin damytýǵa septigin tıgizetin bolady. Astanany kórkeıtýge zor úles qosqan Sizge jáne óńir turǵyndaryna shynaıy rızashylyǵymdy bildiremin. Sizderge zor densaýlyq, baq-bereke tileımin!» - delingen Elbasynyń alǵys hatynda.

Aıta keteıik, Uzaq qashyqtyqty qamtıtyn jáne tolyq jabdyqtalǵan velosıped jolaǵy Esil ózeniniń jaǵalaýynan D.Qonaev kóshesindegi kópirge deıingi aralyqty qamtıdy.

Esil ózeniniń boıy men sol jaǵalaýy jáne EKSPO kesheniniń nysandary arqyly ótedi. 56 shaqyrym velojol salýǵa Qostanaı oblysy da aıtarlyqtaı úles qosty.