Arhımed Muhambetov: Keıki batyr kesenesi janynan servıstik ortalyq ashý kerek
Oblys ákiminiń sózinshe, servıstik qyzmet kórsetý salasy shalǵaı aýylda suranysqa ıe bolýy kerek. Sebebi, bul - jumyssyzdyqpen kúresýdiń bir túri.
«Qazir aqyly qyzmet túrin qoldaný zaman talabyna aınaldy. Sondyqtan, bul tusta Amangeldi aýdany da qarap qalmaýy tıis. Aýdan tóńireginde tarıhı eskertkishter jeterlik. Solardyń biri - Keıki batyr kesenesi. Kesene orny Amangeldi aýdany ortalyǵyna jaqyn tustan ádeıi tańdaldy. Jańa memorıaldyq keshenniń qurylysy boıynsha barlyq jumystar belgilengen ýaqytta aıaqtaldy. Onyń barysyn únemi qadaǵalap otyrdyq. Endi bul mańaıdan servıstik ortalyqtar ashý kerek. Sonda jumyssyzdyq máselesi edáýir sheshilip qalady. Ol óz kezeginde aýdan ekonomıkasyn alǵa bastyrýǵa septigin tıgizedi», - dedi óńir basshysy.
Arhımed Muhambetov servıstik ortalyqtar ashý kezinde aýdannyń ekonomıkalyq áleýetin eskerý kerektigin aıtty.
«Kesenege jaqyn ornalasqan Amantoǵaı, Jaldama aýyldarynda qonaq úı bar ma? Mine, osyny esepke alyńyzdar. Keıki batyr kesenesi kúnine 4-5 adam soǵyp, taǵzym etetin orynǵa ǵana aınalmaýy tıis. Qazir jol jaqsy. 2019 jyldyń sońyna deıin Amangeldi-Torǵaı tas joly tolyq jóndeýden ótedi. Mynadaı səýletti ǵımaratqa adamdardy kóbirek tartý qajet. Ol úshin kesene mańynan kelýshilerge túrli qyzmetter usynylýy mańyzdy. Bul jumysty aýdan ákimi basshylyqqa alsyn. Ártúrli joldardy qarastyryńyzdar», - dedi Qostanaı oblysynyń ákimi.
Eske salsaq, Keıki batyr kesenesi «Kıeli Qazaqstan» jobasyna endi. Al belgili qurylysshy Abaı Muqanov nysandy sáýlet óneriniń osy zamanǵy kórkem úlgisi dep baǵalaǵan. Dýlyǵa pishindes 16 qyrly dóńgelek keseneniń bıiktigi - 15 metrge jýyq. Aıta keteıik, qurylysqa irkit paıdalanylǵan.