Arhımed Muhambetov: Kelesi jyldyń basynda 100 dárigerge baspana beriledi
Jıyn barysynda 2020 jyly atqarylǵan jumystary taldanyp, kelesi jyldyń mindet-josparlary quryldy. Óńir basshysy bıyl medıtsına qyzmetkerlerine úlken salmaq túskenin aıtty. Sonymen qatar Arhımed Muhambetov Úkimettiń Densaýlyq saqtaý salasyn qoldaý boıynsha keshendi sharalar qabyldaǵanyn atap ótti.
«Jyl basynan beri Memleket basshysynyń tapsyrmasy boıynsha dáriger mártebesin arttyrý sheńberinde ortasha jalaqy 30%-ǵa ulǵaıdy. Bul kómek orta medıtsınalyq personaldardy da aınalyp ótken joq. Dárigerlerdiń ortasha aılyq jalaqysy 341 myń teńgeni qurady. Budan basqa, osy jyldyń 11 aıynda Sovid-19 koronavırýsymen kúreske tartylǵan 16 548 medıtsına qyzmetkerine jalpy somasy 3,7 mlrd teńgege ústemeaqy tólendi. Qostanaı oblysyna medıtsına qyzmetkerlerin tartý boıynsha belsendi jumys jalǵasýda. Kóterme járdemaqy tóleý aýyldarda da qarastyrylǵan. Shalǵaı eldi mekenge barǵan dárigerge 1,5 mln teńgeden tólense, qaladaǵylarǵa 1 mln teńgeden beriledi. Osy qoldaý sharasymen 114 medıtsına qyzmetkeri qamtyldy. Taǵy 185 medıtsına qyzmetkerine baspana kilti tapsyryldy. Buǵan qosa «Otbasy banki» AQ jelisi boıynsha 3 jylda 70 medıtsına qyzmetkeri turǵyn úı satyp aldy. Oblysqa kelgen dárigerlerge Qazaqstan ıpotekalyq kompanııasy arqyly da turǵyn úı beriledi. Kelesi jyldyń basynda taǵy 100 dáriger jeke baspanasyna qol jetkizedi», - dedi Arhımed Muhambetov.
Óńir basshysy aıtqandaı, medıtsınalyq uıymdardy materıaldyq-tehnıkalyq jaraqtandyrýǵa jergilikti bıýdjetten 6,6 mlrd teńge bólindi. Bul 2019 jylǵy deńgeıden 2,4 ese artyq. Nátıjesinde Qostanaı oblysynda birneshe aýrýhana jańaryp, ınfektsııalyq emhana paıdalanýǵa berildi.