Arhımed Muhambetov 1,5 mlrd teńgeniń jataqhana qurylysyn synǵa aldy
Qostanaı oblysynda Avtomobıl joldary, Polıtehnıkalyq jáne Medıtsınalyq kolledjder stýdentteri úshin jataqhanalar salý josparlanýda. Oblys ákiminiń orynbasary Sergeı Karplıýk atap ótkendeı, jataqhananyń qurylysy aýyldyq jerlerdegi jastardy turǵylyqty baspanamen qamtamasyz etýge jáne 1250 stýdenttiń ómir súrý jaǵdaıyn jaqsartýǵa múmkindik beredi.
«Qazirgi ýaqytta eki jataqhananyń jobalyq-smetalyq qujattamasy ázirlendi. Avtomobıl joldary kolledji janynan 500 oryndyq jataqhana qurylysy bastalady. Onyń smetalyq quny 1,6 mlrd teńgege baǵalandy. Sondaı-aq Polıtehnıkalyq kolledj janynan 500 oryndyq jataqhana qurylysyna smeta boıynsha 1,5 mlrd teńge jumsalady. Al Medıtsınalyq kolledj jataqhanasy qurylysynyń jobalyq qujattamasy jeltoqsan aıynda bekitiledi», - dedi S.Karplıýk.
Atalmysh oqý oryndarynyń jataqhanalaryn salýǵa jergilikti bıýdjetten qarjy bólinedi.
Oblys basshysy Arhımed Muhambetov jobalardyń qymbattyǵyn synǵa aldy. Onyń aıtýynsha, qarjyny barynsha únemdeý qajet. Sondyqtan qurylys jumystaryn óz qadaǵalaýyna almaq.
«500 oryndyq kolledj jataqhanasyna 1,5 mlrd teńge aqsha jumsaý qymbatqa túsedi. Meniń orynbasarlarym qomaqty qarjy jumsaýǵa jol bergen. Olar jobalyq qujattamany bastapqyda baqylaýǵa alýy tıis edi. Endi bul jobalardy jeke baqylaýyma alamyn. Buǵan deıin de aıtqan bolatynmyn, jataqhana qurylysyna 1 mlrd teńgeden artyq aqsha jumsamaýǵa mindettimiz. Stýdentter úshin turatyn bólme, ashana, jýynatyn jer, dárethana bolsa jetkilikti. Ońtaılandyrý jumystaryn júrgizgen durys», - dedi óńir ákimi.