«Arǵymaqqa» mindim dep, aqyl-esten aıyrylma!» - baspasózge sholý

ASTANA. 22 qarasha. QazAqparat - «QazAqparat» agenttigi respýblıkalyq basylymdarda 22 qarasha, juma kúni shyqqan ózekti materıaldarǵa sholýdy usynady.

***

Memleket basshysy Úkimettiń keńeıtilgen otyrysynda elimizdiń qarqyndy damýyna kedergi keltiretin kóptegen kemshilikterdi alǵa tar­typ, oǵan jol berip otyrǵan birqatar sheneýnikterdiń jumysyn synǵa alǵan bolatyn. Ásirese, memlekettiń el ekonomıkasyn órken­de­týdegi syndarly jumystaryna syn aıtqyzatyn barlyq salaǵa tán jemqorlyq kórinisteri ekeni anyq. Sondyqtan, Elbasy bul oraı­da kimge bolsa da sybaılas jemqorlyqqa eshýaqytta tózbeý kerek­ti­gin qatań talap etti. Sonyń biri qoldanystaǵy memlekettik satyp alýdyń sybaılas jemqorlyqqa barynsha beıim sala ekendigi qazir bar­shaǵa málim. Osynyń ushar basynan bastaý alǵan sybaılastyq el­ qarjysyn jappaı talan-tarajǵa salýǵa jol ashady. Al ony, ıaǵnı atalǵan saladaǵy jemqorlyqty alǵashqylardyń biri bolyp­ anyq­taıtyn organ - Qarjy polıtsııasy. Osy rette «Egemen Qazaqstan» gazeti Elbasynyń qatań sy­nynan keıin memlekettik organdardy jaılaǵan sybaılas jem­qor­lyqty joıýdyń jaıy jáne bul baǵyttaǵy atqarylyp jatqan jumystar týraly Ekonomıkalyq qylmysqa jáne sybaılas jemqorlyqqa qarsy kúres agenttigi tóraǵasynyń orynbasary Marat Ahmetjanovqa jolyǵyp, ózekti máseleler týraly aıtyp berýin suraǵan. Suhbat basylymnyń búgingi nómirinde «Sybaılastar tenderdi qalaı tastar?» degen taqyryppen berilgen.

Osy basylymnyń jazýynsha, ótken on aıdyń ishinde Jambyl oblysy joldarynyń boıynda 1326 jol-kólik oqıǵasy bolyp, sonyń saldarynan 272 adam qaza tapqan. Al, on eki múshesi sap-saý adamnan taban astynda kemtar, múgedek janǵa aınalǵandardyń sany 2143 adamǵa jetken. Jol-kólik oqıǵasynyń Jam­byl óńirinde jıi oryn alýynyń sebepteri bar ma? Bar bolsa, ol ne? Oblystyq ІІD qyzmetkerleri bul sebepterdiń birin Ońtústik Qazaqstan oblysy men Ózbekstan, Qyrǵyzstan elderinen keletin avtotransporttar leginiń kúrt kóbeıip ketýinen kóredi. «Jambyl joldary arqyly bir sótkede 2500 taransport quraldary ótedi» deıdi olar. Odan keıin «Batys Eýropa - Batys Qytaı» jolynyń boıyndaǵy ýaqytsha qolaısyzdyqtarǵa (transporttardy ýaqytsha bir baǵyttaǵy jolmen júrgizýge májbúrleý, qarsy baǵyttaǵy eki joldyń arasynda qorshaýdyń bolmaýy jáne, t. b.) silteme jasaıdy. Jol boıyndaǵy ólim-jitimge ákelip soǵatyn apattardyń endi bir sebebi - jol-baqylaý polıtseıleri shtatynyń azdyǵy-mys eken. Bul «kemshilikti» túzetý úshin oblystyq ІІD basshylyǵy jol-baqylaý polıtseıleri shtatynyń sanyn aldaǵy ýaqytta taǵy 200 adamǵa kóbeıtýdi surap ІІM-ine usynys ázirlep te qoıypty. Maqala «Arǵymaqqa» mindim dep, aqyl-esten aıyrylma!» degen taqyryppen berilgen.

***

Qasym-Jomart Toqaevtyń tóraǵalyǵymen ótken Senattyń jalpy otyrysynda Qazaqstannyń birneshe jyldardaǵy basty qarjylyq qujattary - «Bıýdjet-2013»-tiń naqtylanǵan jobasy jáne aldaǵy úsh jyl bıýdjetiniń jobasy qaraldy. Osy jaıt arqaý bolǵan maqala «Aıqyn» gazetinde «Qazaq jeri Reseıdiń polıgondarynan qutylýy múmkin» degen taqyryppen berilgen. Basylymnyń jazýynsha, senator Sársenbaı Eńsegenov tikeleı Úkimet basshysyna júgingen. Ol maýsym aıynyń aıaǵynda Premerdiń qabyldaýynda bolypty, sonda Atyraý oblysynyń úlken máselesi - Taısoıǵan polıgonyna qatysty másele kótergen eken. Sársenbaı Qurmanulynyń aıtýynsha, Taısoıǵan polıgonynyń quramynda Atyraý oblysynyń úsh aýdanynyń eldi mekenderi kiredi. «Sonyń ishinde Taısoıǵan selolyq okrýginiń ortalyǵy - Taısoıǵan aýyly polıgon aýmaǵynda tur. Onyń 2 myńǵa jýyq turǵyny 22 jyl boıy úıleri turǵan jerdiń qujattaryn ala almaýda. 50-ge tarta sharýa qojalyq óz jumysyn júrgize almaı keledi. «QazMunaıGazǵa» qarasty 2 ken ornynda birikken kásiporyn óz jumystaryn isteı almaýda. Saıyp kelgende, bul myńdaǵan adamnyń jumys orny, qosymsha túsetin tabys salyǵy», - dedi ol. «Bul mańyzdy másele, - dedi Úkimet basshysy Serik Ahmetov. - Sonymen birge ol - kúrdeli másele. Ony bárimiz túsinip otyrmyz. Ol jurtymyzdyń, memleketimizdiń qaýipsizdigine baılanysty. Biz Reseı Úkimetine úkimetaralyq komıssııa arqyly usynys berdik».

«Jylyna 60 myń tonna et eksporttaýǵa qol jetkizip qoıyppyz da, endigi qalǵany onyń kólemin 100 myń tonnaǵa jetkizý bolyp pa? «Aýrý qalsa da, ádet qalmaıdy» degen halyq danalyǵy qalaı taýyp aıtylǵan dep tańǵalmasqa sharań joq», - dep jazady «Aıqyn» gazeti «Et eksportynyń eńsesi túzele me?» degen taqyryptaǵy maqalasynda. Basylymnyń jazýynsha, Aýyl sharýashylyǵy vıtse-mınıstri Gúlmıra Isaeva mal sharýashylyǵy máseleleri boıynsha alqa otyrysynda elimizde 2020 jylǵa deıingi master-josparlardy júzege asyrý aıasynda et óndirisi boıynsha óndiristi 650 myń tonnaǵa deıin, al eksportty jylyna 100 myń tonnaǵa deıin jetkizý maqsaty turǵandyǵyn aıtqan. Alaıda búgingi daıyndyq barysy 60 myń tonna et eksporttaýdyń aýyly alystaı bastaǵanyn baıqatyp otyr. «Berilgen tapsyrmanyń, oǵan bólingen 120 mlrd teńgeniń jelge ushqaly turǵanyna qynjylǵan Elbasy aýyl sharýashylyǵyn basqaryp otyrǵan búgingi top-menedjerlerdi qýyryp alǵanyna da kóp ýaqyt óte qoımaǵanyn ózderińiz de jaqsy bilesizder. Aldyńǵy joba-baǵdarlamalardy júzege asyryp, oǵan bólingen qarjyny ıgerip almaı jatyp, qulashty júzege asyrylý-asyrylmaýy ekitalaı kúmándi josparlarǵa sermeıtinimiz taǵy da aldan shyǵyp otyrǵan syńaıly. Aýyl sharýashylyǵy mınıstrliginiń endi jylyna 60 myń tonna etti bylaı qoıyp, ony 100 myń tonnaǵa jetkize alamyz dep jelpinip otyrǵany tańǵaldyrmaı qoımaıdy»,- delingen maqalada.