Argentınalyq shabýylshy madrıdtik «Realdyń» qaqpasyna tórt gol soqty

ASTANA. QazAqparat – Fýtboldan Ispanııa chempıonatynyń 31-týrynda «Jırona» óz alańynda Madrıdtiń «Realyn» qabyldap, 4:2 esebimen jeńiske jetti, dep habarlaıdy QazAqparat tilshisi.

Tórt goldy da «Jıronada» oınaıtyn argentınalyq shabýylshy Valentın Kastelıanos soqty.

V.Kastelıanos 12-mınýtta esep ashty. 12 mınýttan keıin esepti 2:0-ge jetkizdi. 34-mınýtta «Realdan» brazılııalyq Vınısıýs Jýnıor esepti qysqartty. Áıtse de 46-ynshy jáne 62-mınýtta Messıdiń otandasy taǵy da mergendigimen kózge tústi. 85-mınýtta «Realdan» ıspanııalyq Lýkas Vaskes matchtyń núktesin qoıdy.

Budan buryn «Realdyń» qaqpasyna 2012-2013 jylǵy maýsymda dortmýndtyq «Borýssııanyń» shabýylshysy Robert Levandovskıı Chempıondar lıgasynyń jartylaı fınalynda tórt gol soqqan edi.

Al Ispanııa chempıonatynda HHІ ǵasyrda V.Kastelıanos «Realmen» oıynda poker avtory atanǵan birinshi fýtbolshy bolyp otyr.

Ispanııa birinshiliginde «Real» 65 upaımen týrnır kestesinde ekinshi, al «Jırona» (41 upaı) toǵyzynshy orynda tur.

«Realdan» bir oıyny kem «Barselona» 76 upaımen jekedara kósh bastap keledi.

Eske sala keteıik, budan buryn Messıdiń «Barselonaǵa» qaıta oralǵan jaǵdaıda jylyna 25 mln eýro kóleminde jalaqy alatynyn jazǵan bolatynbyz.