Argentına prezıdentiniń reformalaryna qarsy narazylyq sherýleri qaqtyǵysqa ulasty

<p>ASTANA. KAZINFORM &ndash; Býenos-Aıres polıtsııasy zańnamaǵa engizilgen ózgerister talqylanyp jatqan Ulttyq kongress ǵımaratynyń mańynda Argentına prezıdenti Haver Maılıdiń reformalaryna qarsy narazylyq aktsııasyn taratý úshin kózden jas aǵyzatyn gaz ben sý atqyshtaryn qoldandy, dep habarlaıdy <a href="https://www.bbc.com/russian/articles/c4nnjg9nrnxo" target="_blank" rel="noopener">BBC</a>.</p>

Reformalardyń mıllıondaǵan argentınalyqtarǵa zııanyn tıgizetinin alǵa tartqan sherýshiler polıtsııaǵa qaraı janarmaı quıylǵan shólmek pen tas laqtyryp, eki kólikti órtep jiberdi. Aktsııanyń birneshe qatysýshysy jaraqat aldy.

Argentınanyń Qaýipsizdik mınıstrligi AFP agenttigine habarlaýynsha, kem degende toǵyz polıtsııa qyzmetkeri zardap shekti. 10 adam qamaýǵa alyndy.

Haver Mıleıdiń Argentına ekonomıkasyn jandandyrý úshin usynǵan reformalar paketi ekonomıkalyq tótenshe jaǵdaı jarııalaýdy, zeınetaqyny qysqartýdy jáne eńbek quqyqtaryn shekteýdi qamtıdy.

Sherýdi uıymdastyrǵan solshyl partııalar, kásipodaqtar men qoǵamdyq uıymdar bul sharalarǵa qarsy shyqty.

Mıleıdiń baspasóz qyzmeti sherýshiler tóńkeris jasap, Kongress jumysyna kedergi jasamaq bolǵanyn, al qaýipsizdik kúshteri «terrorıstik toptardy basyp-janshýǵa áreket jasady» dep málimdedi.

600-den astam baptan turatyn reformalardyń bastapqy paketi ótken jyldyń sońynda parlamentke jiberilgen bolatyn. Oppozıtsııanyń qysymymen ol keri qaıtarylyp, eleýli ózgeristermen qaıta engizildi (onda 238 bap qaldy).

Kongress depýtattarynyń palatasy jańa jobany sáýir aıynda maquldady. Senat ony sársenbide talqylady.

Joǵarǵy palatada sóz sóılegen oppozıtsııalyq zań shyǵarýshylar reformalar paketi eldi ondaǵan jyldarǵa artqa tastaıtynyn aıtty.

«Argentınada bizdi 100 jylǵa artqa tastaıtyn zań talqylanyp jatqanyna sene almaı otyrmyz», - dedi narazylyq bildirýshilerdiń biri, 55 jastaǵy zańger Fabıo Nýnes.

Nátıjesinde keshke qaraı Senat reformalar jobasyn jalpy maquldady, al ony talqylaý beısenbi kúni jalǵasady.

Senat maquldaǵannan keıin qujat túpkilikti bekitý úshin tómengi palataǵa qaıtarylýy tıis.