Arendalyq baspana qurylysyna qyrýar qarjy bólinedi
Qarjy mınıstriniń mindetin atqarýshy Berik Sholpanqulovtyń aıtýynsha, aldaǵy úsh jylda «Nurly jer» baǵdarlamasyna 231,4 mlrd teńge bólinedi degen jospar bar. Sonyń ishinde arendalyq baspana qurylysyna 25 mlrd teńge qarastyrylǵan. Atalǵan qarjy jergilikti ákimdikterge bólinedi. Olar arendalyq turǵyn úıge tapsyrys berip, osy sanattaǵy baspanany qurylys kompanııalarynyń kómegimen salady. Barlyq arendalyq páterler ákimdik kezeginde turǵan azamattarǵa taratylady. Arendalyq baspana uzaq merzimge jalǵa beriledi. Ony jeke menshikke aýdarýǵa ruqsat joq.
«Jalpy, bıýdjette qarastyrylǵan qarajatqa 170,8 myń sharshy metr (bir páterdiń aýdany 50 sharshy metr bolsa, ol shamamen 3 400 páter - avt.) arendalyq turǵyn úıdi paıdalanýǵa berýge bolady. Budan bólek, turǵyn úılerge ınjenerlik-kommýnıkatsııalyq jelilerdi tartý jumystary jalǵasatyn bolady. Oǵan 75,3 mlrd teńge bólinedi. Osy aqshaǵa shamamen 922 shaqyrym sý, jylý, gaz jáne elektr jelileri tartylady degen jospar bar», - dedi B.Sholpanqulov búgin Parlament Májilisinde.
Onyń sózine qaraǵanda, kelesi jyldan bastap Turǵyn úı qurylys jınaq banki aldyn ala jáne aralyq ıpotekany tómen stavkamen berýdi bastaıdy.
Aıta keteıik, B.Sholpanqulov depýtattarǵa 2019-2021 jyldarǵa arnalǵan respýblıkalyq bıýdjetti tanystyrdy. Oǵan sáıkes, kelesi jyly zeınetaqynyń ortasha mólsheri kóteriledi.
Al QR Ulttyq ekonomıka mınıstri Tımýr Súleımenov depýtattarǵa 2019-2023 jyldarǵa arnalǵan ekonomıkalyq damý boljamyn da tanystyrdy.
«2019 jyly munaı baǵasynyń bir barreli 66,7 AQSh dollaryn quraıdy degen boljam bar. Osyny eskere otyryp, bazalyq stsenarııde munaıdyń baǵasy 60 AQSh dollary deńgeıinde alyndy. 2019 jyly jalpy ishki ónim 3,9 protsent deńgeıinde, al 2023 jyly 4,6 protsentke deıin ósedi. Atalǵan kezeńde jalpy ishki ónimniń ortasha jyldyq ósý qarqyny 4,2 protsent bolady degen boljam bar», - deıdi T.Súleımenov.
Onyń aıtýynsha, kelesi jyly nomınaldy jalpy ishki ónim 64,1 trln teńge bolsa, 2023 jylǵa deıin atalǵan kórsetkish 86,9 trln teńgege deıin ósedi. Osylaısha, jan basyna shaqqandaǵy jalpy ishki ónim 9,9 myń AQSh dollarynan 12 myń dollarǵa deıin ulǵaıady.