Ardagermen kezdesý soǵys týraly kitap oqyǵanmen birdeı - áskerı qyzmetshi

TARAZ. QazAqparat – Taraz óńirlik garnızony áskerı polıtsııa basqarmasynyń áskerı qyzmetshileri Jeńis kúni qarsańynda soǵys ardageri Vladımır Kolesnıchenkony quttyqtap bardy, dep habarlaıdy QazAqparat Qorǵanys mınıstrliginiń baspasóz qyzmetine silteme jasap.

Olar maıdangerge syılyqtar men Qazaqstan Qarýly kúshteri Áskerı polıtsııa bas basqarmasynyń bastyǵy, polkovnık Rýslan Qulymbetovtyń Alǵys hatyn tabys etti.

Al, 96 jastaǵy Vladımır Vasılevıch Kolesnıchenko qonaqtardy ózi qarsy aldy. Salaýatty ómir salty jáne balalary men nemereleriniń qamqorlyǵy maıdangerdiń densaýlyǵy men sergektigin saqtap qaldy. Ol qonaqtardan áskerı polıtsııanyń maqsattary men mindetteri týraly surap bildi. Soǵystaǵy qyzmeti týraly aıtyp berdi.

«Biz ýaqyttyń qanshalyqty tez ótkenin baıqamaı qaldyq. Áńgime sonshalyqty qyzyqty boldy», - deıdi Áskerı polıtsııa basqarmasy jedel den qoıý bóliminiń aǵa ofıtseri, maıor Smadııar Turahanov.

Áskerı qyzmetshiler maıdangerdiń ár sózin muqııat tyńdady. Vladımır Vasılevıch Kolesnıchenko – Tarazda turyp jatqan toǵyz ardagerdiń biri. Áskerıler úshin olardyń janynda ótkizgen ár sát óte mańyzdy jáne qymbat. Olardyń aıtýynsha, mundaı áńgimeler soǵys týraly kitap oqyǵanmen birdeı.