Ardagerlerdiń jańa sanatyna járdemaqy alýǵa qandaı qujat ótkizý kerek

NUR-SULTAN. QazAqparat – Ardagerlerdiń jańa sanattaryna engen azamattar járdemaqy alý úshin qandaı qujattardy ótkizýi kerek? Qujattar tizimi jaıly OKQ-da ótken baspasóz máslıhatynda QR Eńbek jáne halyqty áleýmettik qorǵaý vıtse-mınıstri Erlan Áýkenov aıtyp berdi, dep habarlaıdy QazAqparat tilshisi.

«Ardagerlerdiń jańa sanatyna engen azamattarǵa arnaıy memlekettik járdemaqy taǵaıyndaý úshin ne isteý kerek? «Ardagerler týraly» zańǵa qol qoıylǵannan keıin arnaıy memlekettik járdemaqy alý úshin olar Halyqqa qyzmet kórsetý ortalyǵyna barý mindetti. Qolyńyzda jeke kýálik, basqa memlekettiń aýmaǵyndaǵy áskerı qımyldarǵa qatysqanynyńzdy rastaıtyn áskerı komıssarıattan anyqtama bolýy tıis», - dedi Erlan Áýkenov.

Vıtse-mınıstrdiń aıtýynsha qazirgi tańda Qazaqstanda tórt bitimgerlik mıssııaǵa qatysqan 11 myńǵa tarta azamat bar.

Aıta ketsek buǵan deıin Erlan Áýkenov Qazaqstanda ardagerlerdiń jańa sanattaryna engen azamattarǵa qandaı járdemaqy beriletinin aıtyp bergen bolatyn. Ardagerlerdiń jańa sanattaryna engen azamattarǵa aı saıyn 4,8 AEK kóleminde, ıaǵnı 13 435 teńgelik arnaıy memlekettik járdemaqy taǵaıyndaý usynylyp otyr. Sonymen qatar olarǵa buryn kórsetilip kelgen jeńildikter men kepildikter kúshinde qalady.