«Ardagerlerdi ardaqtaıyq!» Respýblıkalyq sharasy aıasynda Almaty oblysynan Reseıge delegatsııa attanyp ketti

ALMATY. Mamyrdyń 17-si. QazAqparat / Ádilet Musahaev / - «Nur Otan» HDP-nyń Almaty oblystyq fılıalynyń uıymdastyrýymen Uly Jeńistiń 65 jyldyǵyna oraı oblystaǵy UOS ardagerleriniń urpaqtary batyr babalary erlik kórsetken jer - Reseı Federatsııasynyń Dýbosekovo selosyna keshe keshkisin attanyp ketti,

dep habarlaıdy QazAqparat.

Sapardyń negizgi maqsaty - yntymaǵy jarasqan Reseı men Qazaqstan arasyndaǵy dostyqty nyǵaıta otyryp, Keńes Odaǵynyń Batyry B.Momyshulynyń týǵanyna 100 jyl tolýyna arnalǵan ıgi istermen máskeýlikterdi tanystyryp, eki el arasynda tájirıbe almasý. Sonymen qatar oblystan shyqqan batyrlar esimin jas urpaqqa dáripteý, jastarǵa patrıottyq tárbıe berip, maıdangerlerimizdiń erligin máńgilik jadyda saqtaý.

Osy turǵyda «Nur otannyń» oblystyq uıymy «Ardagerlerdi ardaqtaıyq!» Respýblıkalyq sharasy aıasynda «Jeńiske jol ashqan panfılovshylar» atty olardyń urpaqtarymen jáne maıdandastarymen júıeli kezdesýler uıymdastyrýda.

Kezdesý barysynda panfılovshylar urpaqtarynyń jasaǵan usynysy boıynsha UOS-nyń ardageri Nıkolaı Novohatskıı, «Nur Otan» HDP Almaty oblystyq fılıaly tóraǵasynyń orynbasary Sadyq Ábdiqadyrov, Tólegen Musabekov, Tileýhan Esbolatov, Aleksandr Bondarenko syndy UOS ardagerleriniń nemereleri Reseıge attanyp ketti.