«Ardagerler týraly» Zańda soǵysqa qatysqan barlyq sanattaǵy tulǵalarǵa ortaq mártebeni belgileý qajet - «Nur Otan» HDP
Bul týraly búgin «Nur Otan» Halyqtyq-demokratııalyq partııasy janynan qurylǵan Ardagerler jáne áskerı-patrıottyq uıymdar keńesinde málim etildi. Osy keńestiń tóraǵasy, general-maıor Qaırat Satybaldyulynyń atap ótkenindeı, soǵysqa attanar aldynda árbir jaýynger maıdannan qaıtyp oralǵanda «soǵysqa qatysýshy» mártebesin alatynyna, soǵan tıisti áleýmettik ıgilikterge ıe bolatynyna senimdi bolýy shart.
«Ardagerler týraly» Zań jobasyna tolyqtyrýlar men ózgertýler engizý qajet. Óıtkeni ol qolyna qarý alyp, óziniń konstıtýtsııalyq, ınternatsıonalıstik boryshyn ótegenderdiń quqyqtaryn tolyq asha almaı otyr. Kóptegen ardagerler ol zańda soǵysqa jáne soǵys qaqtyǵystaryna qatysqan barlyq sanattaǵy tulǵalarǵa ortaq biryńǵaı mártebeni belgileý jóninde usynys aıtýda. Sebebi bul qadam ardagerler men Otan qorǵaýshylardyń qoǵam arasyndaǵy bedelin arttyrýǵa sep bolady»,-deıdi Q. Satybaldyuly.
«Ardagerlerdi qarjylyq máseleler alańdatpaıdy, tek olardyń qoǵamdaǵy mártebesi tıisti túrde belginse dep tileıdi, ardagerlerdiń balalary olardyń ákeleri qaı memleket úshin soǵysqandaryn bilse eken dep tileıdi»,-dedi Keńes tóraǵasy.
Onyń aıtýynsha, Jastardyń patrıottyq tárbıesi, olardyń Otan úshin qurbandyqqa barýy ardagerlerge jáne úlken kisilerge degen qoǵamnyń qatynasyna baǵynyshty.
Sondyqtan QR Qorǵanys mınıstrligi eger belsendilik tanytyp otyrsa, osy usynystyń ıdeologııalyq qoldaýshysy «Nur Otan» partııasy Parlamenttegi fraktsııasynyń kómegimen «Ardagerler týraly» Zań jobasyna tıisti oń ózgertýlerdi engizýge múddeli bolyp otyr.
Bizdiń elimizde 14 myńǵa jýyq Uly Otan soǵysynyń ardageri bar. Jyl saıyn olardyń sany azaıyp keledi. Aýǵan soǵysyna qazaq jerinen 22,5 myń jaýynger attandy. Qazirgi kezde aýǵan ardagerleri 18-19 myńdaı ǵana.