Ardagerler izimen: Tótenshe jaǵdaılar salasynyń ókilderi tyl eńbekkerlerin quttyqtady

QARAǴANDY. QazAqparat – Jeńis kúni Qaraǵandy oblysynyń Osakarov aýdanynyń tótenshe jaǵdaılar men №17 órt sóndirý bóliminiń qyzmetkerleri Ekinshi dúnıejúzilik soǵystaǵy tyl eńbekkeri jáne qyzmet ardageri Vasılıı Andreevıch Hıjnıakqa baryp qaıtty, dep habarlaıdy QazAqparat tilshisi.

Vasılıı Andreevıch Ekinshi dúnıejúzilik soǵys bastalǵanda áli bala edi. Aýylda eresek er adamdar bolmady, barlyǵy Otan qorǵaý úshin maıdanǵa attandy. Vasılıı soǵystyń alǵashqy kúnderinen bastap Zerendi aýdanynyń Dorogeevka kolhozynda jumys isteı bastady. Sol kezde 10 jastaǵy balaǵa eki buqadan turatyn vagon senip tapsyrylǵan, onda ózi qatarlas uldarmen birge jer jyrtyp, eńbek etti. Ol ýaqytta 1 kúndik jumys 200 gramm astyqqa teń bolǵan. 1943 jyly Vasılııge kombaın astyndaǵy astyqty buqalarmen tasý tapsyryldy.

Onyń aıtýynsha, bul senim adal eńbektiń arqasynda bolǵan. Tańnyń atysynan keshtiń batysyna deıin jumys. Úıge qaıtpaı, shópte jatyp uıyqtaǵan. Aıaqtarynda aıaq kıim bolmaǵandyqtan, buqa terisinen postaldar tigip kıgen. Ol kún sáýlesinen ysyp, aıaqtaryn qatty qysatyn bolǵan.

Vasılıı Andreevıchtiń aıtýynsha, uıqynyń shala bolýyna baılanysty kóbi jumysta esin joǵaltatyn. Eńbekkerler kópten kútken Jeńis kúnin de jumysta qarsy aldy. Eńbegi úshin «Eren eńbegi úshin» medalimen marapattalyp, eńbek ardageri atandy.

Soǵystan keıingi jyldary Qurylys jáne aýyl sharýashylyǵynda mehanızator, sondaı-aq ár túrli salalarda jumys istedi.

Órt kúzetine 1978 jyly kelip, zeınetkerlikke shyqqanǵa deıin 12 jyldan astam eńbek etti. «Órt kúzetiniń úzdigi» tósbelgisimen marapattaldy.

Qazan aıynda ardager 90 jasqa tolady, degenmen ol qartaıdym dep qarap otyrmaı, baý-baqshasyn qarap, aýladaǵy barlyq isterdi ózi atqarady. Kúnine 2-3 km júrse, jaz mezgilinde velosıpedpen on shaqyrymnan asa alady.

«Eńbek – bárin jeńbek» degen halyq maqalyn ustanǵan ardager jas urpaqqa tabandylyq, shydamdylyq tanytýǵa keńes beredi. Sondaı-aq jastardy Otandy súıýge, óz otbasy úshin jaýapkershilik tanytýǵa jáne halqymyzdyń barlyq ıgi dástúrlerin saqtaýǵa shaqyrdy.