ArcelorMittal Qazaqstandy sotqa bere almaıdy – mınıstr

<p>ArcelorMittal kompanııasy Qazaqstan Respýblıkasyna qatysty talaptardan, sot talabynan tolyq bas tartatyny týraly kelisimge qol qoıdy. Bul týraly QR Ónerkásip jáne qurylys mınıstri Qanat Sharlapaev aıtty, dep habarlaıdy <a href="https://kaz.inform.kz/?_gl=1*1cookbu*_ga*MTMxOTQ2NjU5MC4xNjk4Mzc1OTcw*_ga_Y44SMVECD5*MTY5ODM3NTk2OS4xLjAuMTY5ODM3NTk2OS42MC4wLjA.&amp;pk_vid=1dac2fba2c02ff6916983759715aaacc" target="_blank" rel="noopener">Kazinform.</a></p>

«Kelissózder aıasynda ArcelorMittal Qazaqstan Respýblıkasyna eshqandaı talap qoımaıtynyn erekshe aıtqym keledi. ArcelorMittal Qazaqstan Respýblıkasyna qatysty talaptardan, sot talabynan, basqa da qaraýshylyqtardan tolyq bas tartatyny týraly kelisimge qol qoıdy. Kelisim halyqaralyq quqyq normalaryn tolyq saqtaı otyryp, quqyqtyq negizde jasaldy», — dedi Qanat Sharlapaev Úkimet úıinde ótken brıfıngte.

Buǵan deıin Q. Sharlapaev Qazaqstan ArcelorMittal-dyń eki kásipornyn 3,5 mlrd dollardan 286 mln dollarǵa arzandatyp alǵanyn, muny elimizdiń iri jáne tabysty kelissózi bolǵanyn aıtqan edi.

Aıta keteıik, búgin «ArselorMıttal Qazaqstannyń» jańa ınvestory anyqtaldy. Jańa ınvestor – qazaqstandyq bıznesmen Andreı Lavrentev. Ol 1979 jyly Almaty qalasynda dúnıege kelgen. «Allur Group» kompanııalar tobynyń Dırektorlar keńesiniń tóraǵasy, onyń quramynda «Agromashholdıng» jáne «SaryarqaAvtoProm» JShS bar. Kompanııalar toby Chevrolet, KIA, JAC jáne LADA avtobrendteriniń Qazaqstan aýmaǵyndaǵy resmı óndirýshisi jáne dıstrıbıýtory.

Sondaı-aq, «ArselorMıttal Temirtaýdyń» ataýy «Qarmet» dep ózgerýi múmkin.

Kazinform agenttigi «ArselorMıttalTemirtaý» tarıhynda qandaı apattar bolǵanyna sholý jasaǵan edi.