Árbir úıde Memlekettik tý ilinip turýy kerek – Jandarbek Málibekuly

<p>Ulttyq sáýlet ónerin damytyp, kirme arhıtektýrany yǵystyryp shyǵarý kerek. Bul týraly belgili sáýletshi, Memlekettik Eltańbanyń avtory Jandarbek Málibekuly málim etti, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

«Elimizde memlekettik rámizderdi nasıhattaý deńgeıin kóterý kerek. Memlekettik Tý ár eldi mekendegi, qalalardaǵy kóshelerde ilinip turýy tıis. Ásirese, Respýblıka kúninde barlyq jerde osy máselege nazar aýdarǵan jón. Ár úıde elimizdiń Týy men Eltańbasy bolǵanyn qalaımyn. Sondyqtan túrli jıyndarda osy taqyrypty kóterýge tyrysamyn», - dedi Jandarbek Málibekuly Kazinform tilshisine bergen suhbatynda.

Aıtýynsha, Eltańbanyń maǵynasyn, ıaǵnı onda beınelengen qundylyqtardy el halqy jaqsy bilýi kerek.

«Eltańba – bizdiń ıdeologııalyq kartamyz. Onda tarıhı jolymyz, syılastyq mektebimiz, ulttyq qundylyqtarymyz eskerilgen. Atap aıtqanda, osy mańyzdy taqyrypty barlyq deńgeıde jastarymyz arasynda túsindirý mańyzdy», - dedi Qazaqstan Eltańbasynyń avtory.

Sáýletshi budan bólek, ulttyq sáýlet óneri baǵytyna da toqtaldy.

«Qazir bizde baıqalyp otyrǵan arhıtektýra bizdiń ulttyq naqyshty eleımeı keledi. Jat arhıtektýranyń bizdiń dástúrge qatysy joq ekenin bilemiz. Bul turǵyda ulttyq arhıtektýrany damytý kerek dep sanaımyn. Ǵylymı zertteý jasaý qajet. Uly Dala órkenıetiniń mádenıeti de, fılosofııasy da baı. Sondyqtan kirme arhıtektýrany yǵystyryp shyǵarý kerek», - dedi Jandarbek Málibekuly.

Eltańba – eldiktiń, táýelsizdiktiń, memlekettiliktiń erekshe belgisi. Buǵan deıin Qazaqstannyń Memlekettik Eltańbasy men onyń avtorlary týraly mańyzdy derekterdi jazǵan edik. 

Aıta keteıik, Memlekettik Týdy paıdalaný erejelerine ózgeris engiziletini habarlanǵan bolatyn. Bıyl qyrkúıek aıynda ashyq talqyǵa shyǵarylǵan Úkimet qaýlysyna saı, endi Týdy balkondarǵa ilýge ruqsat etiledi.