Árbir memlekettik qyzmetker óz ustanymyna berik bolýy kerek - Nurlan Noǵaev
Bul kún 2004 jyldan bastap BUU Bas Assambleıasynyń jarlyǵymen jyl saıyn atalyp ótedi.
Іs-sharany QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Atyraý oblysy boıynsha departamenti jylma-jyl uıymdastyryp keledi. Atalǵan forýmǵa barlyq memlekettik organ basshylary, qala jáne aýdan ákimder, saıası partııalar men ÚEU ókilderi qatysty.
Saltanatty sharada sóz alǵan oblys ákimi Nurlan Noǵaev sala qyzmetkerlerine tilegin bildirdi.
«Elbasynyń Qazaqstannyń básekege qabiletti bolýy týraly tapsyrmalarynda kez-kelgen memlekettik qyzmetkerge zańda kórsetilgen talaptardy is júzinde júzege asyrý mindettelgen. Jemqorlyqqa qarsy kúres sharalary tek agenttikpen shektelmeýi qajet. Árbir memlekettik qyzmetker óz laýazymyna taǵaıyndalǵan kúnnen bastap óz ustanymdaryna berik bolýy kerek. «Týra bıde týǵan joq, týǵandy bıde ıman joq» demekshi, agenttik qyzmetkerleri de qabyldaǵan sheshimderine ádil, laýazymdyq mindeti men azamattyq ustanymyna adal bolǵany lázim», - dedi Nurlan Noǵaev.
Shara barysynda óńir basshysy xalyq arasynda sybaılas jemqorlyqqa qarsy mádenıetti qalyptastyryp júrgen úzdik jýrnalıstik jumystar baıqaýynyń jeńimpazdaryn «Úzdik arnaıy sıýjet», «Úzdik shef redaktor», «Úzdik jýrnalıst» nomınatsııalary boıynsha marapattady.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Atyraý oblysy boıynsha departamenti basshysy Toqtamys Jumaǵulovtyń málimdeýinshe, oblysta jyl basynan 1500-den asa aldyn-alý sharalary ótkizilgen.
«Sybaılas jemqorlyqpen kúreste qoǵam men memlekettiń kúsh-jigerin biriktirý mańyzdy ról atqarady. Oblysta azamattardyń quqyqtyq saýattylyǵyn arttyryp, jemqorlyqqa qarsy mádenıetin jáne qylmystyń aldyn-alý deńgeıin kóterýge baǵyttalǵan jobalar jalǵasyn taba bermek»,- dedi Toqtamys Jumaǵulov.
Baıandamadan keıin jemqorlyqqa qarsy is-qımyl jumystaryna ózindik úlesin qosqan ÚEU ókilderi Ádep jónindegi keńes tóraǵasynyń alǵys xattarymen marapattaldy.