Árbir koreı etnosy Qazaqstandy óz Otany sanaıdy - Roza Pak

ShYMKENT. QazAqparat - Ońtústik Qazaqstan oblystyq koreı etnomádenı birlestiginiń uıymdastyrýymen «Qazaqstan halqy Assambleıasy» ǵımaratynda koreı etnosynyń tili, mádenıeti jáne salt-dástúri kúni atalyp ótti. Bul mereke koreı etnosynyń Qazaqstanǵa kúshtep qonystandyrylǵanyna 80 jyl tolýyna oraı uıymdastyryldy, dep habarlaıdy QazAqparat tilshisi.

Merekelik is-sharanyń ashylýynda sóz alǵan oblys ákiminiń orynbasary Ulasbek Sádibekov oblys ákimi, OQO Qazaqstan halqy Assambleıasynyń tórǵasy Janseıit Túımebaevtyń saltanatty jıynǵa qatysýshylarǵa arnalǵan quttyqtaýyn oqyp berdi.  Onda qoǵamdyq kelisim men jalpyulttyq birlik salasyndaǵy memlekettik saıasatty iske asyrýda koreı etnomádenı birlestiginiń qosyp kele jatqan súbeli úlesi atalyp ótilgen. Jıynda Ulasbek Sádibekuly memlekettiń saıası, ekonomıkalyq jáne mádenı damýyna laıyqty úles qosyp júrgen koreı etnosynyń ókilderine oblys ákiminiń alǵys hatyn saltanatty túrde tabys etti. Merekelik basqosýda OQO Qazaqstan halqy Assambleıasy basshylyǵy men oblystyq qurmetti azamattary,  oblystyq Analar keńesiniń tóraıymy Asma Qalybekova syndy qonaqtar sóz sóılep, birligi  bekem eldiń ǵana berekesi artyp, mereıi ústem bolatyndyǵyn atap ótti.

Qazaq eline zor alǵysyn bildirgen oblystyq koreı etnomádenı birlestiginiń tóraıymy Roza Pak árbir koreı etnosy Qazaqstandy óz Otanym dep sanaıtynyn jetkizdi.

 «Qıyn jyldar kezeńinde qazaq halqynyń bizdiń ata-babalarymyzdy ystyq yqylaspen qarsy alǵanyn alǵys sezimmen eske alamyz. Qazaq halqynyń darhandyǵynyń arqasynda ósip-óndik. Búginde birligi jarasqan, bolashaǵy zor memlekette ómir súrip jatyrmyz. Ortaq Otanymyzdyń kórkeıýi úshin aıanbaı eńbek etetin bolamyz,- dedi Roza Pak.

Saltanatty sharada etnomádenı birlestikterdiń janyndaǵy shyǵarmashylyq ujymdar daıyndaǵan kontserttik baǵdarlama kópshiliktiń nazaryna usynyldy. 

Aıta keterligi, 1937 jyldary 100 myńdaı Qıyr Shyǵys káristeri elimizdiń ár aımaǵyna kúshtep jer aýdarylǵan bolatyn. Búginde elimizde 100 myńnan astam koreı dıasporasy ómir súrýde. Al Ońtústik Qazaqstan oblysynda 9 myńnan astam koreı etnosynyń ókilderi turady. Óńirimizde koreı etnomádenı birlestigi 1989 jyly qurylyp, 1997 jyly «Qazaqstan koreıleri qaýymdastyǵy» respýblıkalyq qoǵamdyq birlestiginiń fılıaly retinde qaıta tirkeýden ótti.   Etnomádenı birlestik janynan ardagerler alqasy men jastar qanaty, jeksenbilik mektep, «Maranbon» folklorlyq ansambli jáne Kentaý qalasy men Maqtaral, Saryaǵash, Saıram, Tólebı aýdandarynda fılıaldary jumys isteıdi. Bul birlestik el birligin bekemdeý, turaqtylyqty saqtaý baǵytynda atqarylǵan keshendi is-sharalardyń janynan tabylyp keledi.

Foto https://yassae.ru