«Árbir qazaqstandyq saılaýǵa oraı 193 myń teńgeden alady» - feık

ASTANA. QazAqparat – WhatsApp jelisinde Qazaqstannyń árbir azamaty «kem degende 193 817 lv» ala alatyny jóninde aqparat tarap jatyr. Stopfake.kz saıty anyqtaǵandaı, bul – feık, dep habarlaıdy QazAqparat.

«Prezıdent Qasym-Jomart Toqaev 19 naýryzda parlament Májilisiniń saılaýy ótetini jóninde, sondaı-aq ekonomıkany qalypqa keltirý, sonyń ishinde quqyly azamattarǵa qarjylaı kómek kórsetý jospary týraly málimdedi.

Eger siz Qazaqstan azamaty bolsańyz, kem degende 193 817 lv» alý múmkindigińiz bar», - delingen taratylǵan habarlandyrýda.

Anyqtalǵandaı, dál osyndaı aqparat 2022 jyldyń jeltoqsanynda da taraǵan. Biraq onda Parlament saılaýy emes, 2022 jylǵy 20 qarashada ótken kezekten tys Prezıdent saılaýy týraly jazylǵan edi. Onda saılanǵannan keıin Qasym-Jomart Toqaev árbir qazaqstandyqqa «193 817 lv» mólsherinde tólem jasaıtyny týraly aıtyldy.

«Shyn máninde, Qazaqstannyń árbir azamatyna tólem jasaý baǵdarlamasy týraly sol kezde de, qazir de aıtylyp jatqan joq.

Sonymen qatar taratylymda soma «lv» belgisimen kórsetilgen. Bul qazaqstandyq teńgeniń emes, lev – bolgar valıýtasynyń belgisi.
Onymen qosa, tólemdi resmı ınternet-resýrstan emes, worldcup-a2.buzz saıtynan alý usynylǵan. Saıttyń basty betinde batyrma ornalastyrylǵan, soǵan ótý arqyly tólem alýǵa bolady-mys.

Alaıda ony basqannan keıin paıdalanýshydan arnaıy jolǵa «uıaly telefon» nómirin engizýisuralady.

Osyndaı úlgidegi bezendirýi jáne kontenti bar saıttar memlekettik organdarǵa tıesili emestigi jáne naqty memlekettik baǵdarlamalarǵa janama bolsyn qatysy joq ekeni anyq.

Qoryta aıtqanda, bul aqparat – paıdalanýshylardyń jeke derekterin osylaı jınaıtyn alaıaqtardyń isi», - delingen Stopfake.kz saıtynda.