Árbir qazaqstandyq memlekettik tildi bilýi tıis – Qazaqstan kúrdteri qaýymdastyǵynyń jetekshisi
Knıaz Mırzoev oblys ákimi Berdibek Saparbaevpen birge Talas aýdany, Qasqabulaq aýylyna baryp, turǵyndarmen kezdesti.
Berdibek Saparbaev qonaqqa oblystaǵy qoǵamdyq-saıası ahýaldyń turaqtylyǵyn, ekonomıkanyń barlyq salalary júıeli túrde damyp kele jatqanyn, oblystyq bıýdjet eki esege artqanyn, memlekettik baǵdarlamalardyń iske asyrylýymen jańa jumys oryndarynyń ashylyp jatqandyǵyn jetkizdi. Aımaq basshysy munyń barlyǵyna jambyldyqtardyń úılesimdi jáne qarqyndy jumysynyń arqasynda qol jetkizilgenin basa aıtty.
«Jambyl oblysynda 80-nen astam ult ókili turady. Qordaı óńirindegi sońǵy oqıǵalar qoǵamdaǵy beıbitshilik pen kelisimniń buzylýyna sebep bola almaıdy. Turǵyndar memlekettiń qamqorlyǵyn sezinýde. Barlyq zardap shekken úıler men basqa da nysandar qalpyna keltirilýde. Memleket basshysynyń qoldaýynyń arqasynda Qordaı aýdanyn damytýǵa qosymsha 32 mıllıard teńge bólindi. Jańa áleýmettik nysandar salynyp, joldar jóndelýde. Jyl sońyna deıin gazdandyrý deńgeıin 95 paıyzǵa jetkizý josparlanyp otyr», - dedi oblys ákimi.
Ol Qasqabulaq aýylyndaǵy turmystyq kıkiljinderge keıbireýlerdiń ultaralyq sıpat berýge tyrysqanyn atap ótti. Biraq jedel sharalardyń arqasynda buzaqylardy tártip saqshylary qolǵa túsirgen.
«Arandatýshylyqqa jol berilmeıdi. Bul bárine jaqsy sabaq bolýy kerek. Beıbit turǵyndardyń tynyshtyǵyn buzýǵa jáne turǵyndar arasynda alaýyzdyq týdyrýǵa eshkimniń quqyǵy joq», - dedi oblys ákimi.
Bul oqıǵa kútpegen jaǵdaı boldy. Óıtkeni Qasqabulaq eń úlgili aýyl retinde barshaǵa málim. Sońǵy birneshe jylda munda birde-bir quqyq buzýshylyq tirkelmegen, dúkenderde spırttik ónimder satylmaıdy.
Knıaz Mırzoev mundaǵy jaqsy dástúrlerdi saqtap qalý úshin balalardy patrıottyq rýhta tárbıeleý qajettigin atap ótti.
«Balalardyń boıynsha kishkentaı kezinen bastap óz eline, dástúrleri men ádet-ǵuryptaryna, memlekettik tilge degen súıispenshiligin qalyptastyrý qajet. Qasqabulaq aýylynyń mektebinde qazaq tilinde oqytatyn synyptar ashyldy. Prezıdent Qasym-Jomart Toqaev qazaq tili ultaralyq qatynastar tiline aınalýy kerektigin aıryqsha aıtqan bolatyn. Árbir qazaqstandyq memlekettik tildi bilýge jáne qurmetteýge mindetti», - dedi ol.
«Ultaralyq kelisim – aımaqtyń tabysty damýynyń basty faktorlarynyń biri. Jambyl oblysy beıbitshilik pen kelisimniń aımaǵy retinde belgili. Men oblys ákimine jedel áreketi úshin jáne Qasqabulaq oqıǵasy kezinde oń sheshim qabyldaı bilgeni úshin alǵys aıtqym keledi. Búgin aýyl turǵyndarymen kezdesip, olardyń kórshilerimen dostyqta jáne ózara túsinistikte ómir súrip jatqandyǵyna taǵy da kóz jetkize tústim», - dedi ol.
Kezdesýde aýyl aqsaqaldary da sóz aldy. Olar munda órkendeýmen qatar, beıbitshilik pen qaýipsizdiktiń qamtamasyz etilgenin jetkizdi.
«Turǵyndar óz aýyldarynyń abyroıyn asqaqtatyp, aıanbaı eńbek etýleri kerek. Áleýmettik máseleler kezeń-kezeńimen sheshiledi. Bıyl Qasqabulaq aýylyn damytýǵa 40 mıllıon teńge bólindi», - dedi Berdibek Saparbaev.
Aýylda 1186 turǵyn turady. 14 sharýa qojalyǵy tirkelgen.
Mektep ǵımaratynyń irgesi 2017 jyly qalanǵan. Qazir barlyq oqýshylar dástúrli túrde bilim alýda. Sol jyly aýyl klýby da jóndeýden ótken desek, balalar ár túrli shyǵarmashylyq sektsııalarǵa qatysyp, ózderin damytýda. Feldsherlik-akýsherlik pýnkt zamanaýı jabdyqtarmen jabdyqtalǵan, eki medbıke jumys isteıdi. Apta saıyn tar beıindi mamandar kelip turady.
Aýyzsýmen qamtýda eshqandaı másele joq. Aýyl 2021 jyly kógildir otynmen jáne mobıldi ınternetpen qamtamasyz etilmek.
Qasqabulaq aýyldyq okrýginiń ákimi Jardıs Úseınov Qasqabulaqtaǵy zańdylyq pen tártiptiń saqtalýyna jaýapty ýchaskelik ınspektor osynda kóship kelgenin, endi ol turǵyndarmen tyǵyz qarym-qatynasta jumys jasaıtynyn aıtty.
Sondaı-aq, mundaı kezdesý 4 myńǵa jýyq kúrd dıasporasynyń ókilderi turatyn Jambyl aýdanynyń Grodekovo aýylynda da ótti.