Árbir besinshi ýnıversıtet túlegi mamandyǵy boıynsha jumysqa turmaǵan

ASTANA. QazAqparat – Elimizdegi ýnıversıtetterdi támamdaǵan árbir besinshi adam mamandyǵy boıynsha jumysqa turmaǵan. Bul týraly elordadaǵy joǵary bilim jáne ǵylym forýmynda Premer-Mınıstrdiń orynbasary Tamara Dúısenova aıtty, dep habarlaıdy QazAqparat tilshisi.

«2022 jyldyń qorytyndysy boıynsha bizdiń oqý oryndarynyń 30 myńnan astam túlegine eńbek naryǵynda suranys bolmady. Bul - bizdiń otandyq ýnıversıtetti bitirgen árbir besinshi túlek. Qazirgi kezde túrli platformalarda jumyspen qamtý tetigi keńeıip keledi. Onda negizinen azyq-túlik jetkizý, taksı qyzmeti sııaqty platformalar bar. Zertteý kórsetkendeı, keıingi tórt jylda onda jumys isteıtin joǵary bilimi bar jumysshylardyń úlesi 10 paıyzǵa, ıaǵnı 23-ten 33 paıyzǵa ósti. Ekonomıkanyń qaı salasyna joǵary bilimdi mamandardy daıyndap jatqanymyzdy túsinip otyrsyzdar dep úmittenemin», - dedi T. Dúısenova ýnıversıtet rektorlaryna qarata aıtqan sózinde.

Onyń aıtýynsha, qazir ekonomıkanyń birqatar mańyzdy baǵyttarynda bilimdi kadrlar tapshylyǵy bar.

«Eger jaldamaly jumysshylardyń jas qurylymyna qarasaq, onda 40 jastan asqandar basym ekeni baıqalady. Qazirdiń ózinde naqty sektorǵa jas mamandar kerek», - dedi Úkimet basshysynyń orynbasary.

Budan buryn habarlanǵandaı, ýnıversıtet oqytýshylaryna jalaqy tóleýdiń jańa júıesi iske qosylmaq.