Árbir azamattan erterek tirkelýdi suraımyz - mınıstr Abaev

ASTANA. QazAqparat - QR Aqparat jáne kommýnıkatsııalar mınıstri Dáýren Abaevtyń oıynsha, mindetti áleýmettik medıtsınalyq saqtandyrý júıesin engizý aıasynda jyldyń basynda bolǵan qarbalastar qaıtalanbaýy tıis. Ol kezde mekenjaı boıynsha ýaqytsha jáne turaqty tirkeýge turmaǵany úshin jaýapkershilik kúsheıtilgen bolatyn. Al kelesi jyldan bastap árbir adam óziniń mártebesin (jumysy bar nemese jumysy joq) anyqtap, taǵy bir ret tirkeýge turýy tıis. Soǵan qaraı medıtsınalyq saqtandyrý qoryna tıisti jarnalar tólenedi, dep habarlaıdy QazAqparat tilshisi.

«Biz barlyq sharalardy iske asyryp jatyrmyz. Jyldyń aıaǵyna deıin úlgeremiz dep oılaımyn. Sosyn el azamattary ózderi de xalyqqa qyzmet kórsetý ortalyqtaryna erterek baryp, tirkelýi qajet. Óıtkeni qazir baryp tirkelmese, 2018 jyly 1 qańtardan bastap taǵy qarbalas bolýy ábden múmkin. Sondyqtan barlyqtaryńyzdy jyldyń aıaǵyna deıin tirkelýińizdi suraımyz», - dedi Abaev búgin Úkimet otyrysynan keıin ótken baspasóz máslıxatynda.

Mınıstrdiń aıtýynsha, xalyqqa qyzmet kórsetý ortalyqtarynda jumys isteıtin mamandar barlyǵyn biledi. Sondyqtan kez kelgen adamdy mártebesine qaraı tirkeı alady. Ol úshin árbir azamat óziniń jeke qujattaryn alyp kelse bolǵany.

Aıta keteıik, búgingi otyrysta QR Premer-Mınıstri Baqytjan Saǵyntaev mindetti áleýmettik medıtsınalyq saqtandyrýǵa baılanysty xalyqty mártebesine qaraı tirkeý kezinde dúrbeleńge jol bermeýdi tapsyrdy.

«Bul - óte mańyzdy másele. Halyq qaıtadan baryp, tirkeýge turýy tıis. Qysta azamattardy tirkeý kezinde bolǵan jaǵdaı qaıtalanbaýy qajet. Ýaqyt bar. Tájirıbe de joq emes. Sondyqtan Aqparat jáne kommýnıkatsııalar mınıstri, sondaı-aq «Azamattar úshin Úkimet» memlekettik korporatsııasy qarbalastarǵa jol bermeýi tıis», - dep atap kórsetti Úkimet basshysy.