Aralyq qorytyndy: 40 myńnan astam talapker negizgi UBT tapsyrdy

ASTANA. QazAqparat - Negizgi UBT bastalǵannan beri 40 myńnan astam adam test tapsyrdy. Onyń ishinde talapkerlerdiń 70%–y qazaq tilinde, 30%-y orys tilinde, 50 adam aǵylshyn tilinde testileýden ótti.

Bul málimetterdi búgin QR Ǵylym jáne joǵary bilim mınıstrliginiń baspasóz qyzmeti jarııalady, dep habarlaıdy QazAqparat.

UBT bastalǵaly shekti baldy 76%-ǵa jýyq talapker jınady. Ortasha balǵa keletin bolsaq, ol 68-di qurady. Eń joǵary ball – 137.

«Negizgi UBT-nyń birinshi aptasy aıaqtaldy. Testileý 5 shildege deıin ótedi. Esterińizge sala ketsem, testileýge qatysýǵa eki múmkindikti esepke alǵanda 305 myńǵa jýyq ótinish kelip tústi. Qazirgi tańda testilenýshilerdiń basym bóligi, atap aıtqanda, 20%-y «Matematıka-Fızıka» pánder kombınatsııasyn tapsyrdy. 14%-y «Bıologııa-Hımııa» kombınatsııasyn tańdaǵan. Eń az tańdalatyn kombınatsııa – «Hımııa-Fızıka», ony 50 adam tapsyrǵan», - dedi QR ǴJBM Ulttyq testileý ortalyǵynyń dırektory Rýslan Emelbaev.

Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda UBT-ǵa 108 talapker qatysqanyn aıta ketken jón.