«Araltuz» zaýytyndaǵy myńnan astam jumysshynyń quqyǵy qorǵaldy
Aral aýdandyq prokýratýrasy mamandary «Araltuz» AQ jumysshylarynyń eńbek quqyǵyn saqtalýy jáne jalpy ekologııalyq jaǵdaıyna taldaý jasady. Taldaý nátıjesinde kóptegen zań buzýshylyq anyqtaldy. Zaýytta barlyǵy 1000-nan astam jumysshy eńbek etedi. Jalaqynyń ortasha mólsheri 70-75 myń teńge. Al ózge de ustalymdardy esepke alǵanda, qyzmetkerlerdiń negizgi bóliginiń jalaqysy 60 myń teńgege jetpeıdi.
Eńbek ujymymen kezdesý barysynda jáne jeke qabyldaý ótkizý kezinde negizgi talaptar boıynsha jalaqy mólsherin arttyrý jáne eńbek jaǵdaıynyń qaýipsizdigin jaqsartý jóninde kómek kórsetý suralǵan bolatyn. Qoldanystaǵy zańnamaǵa sáıkes ujymdyq shartta nemese jumys berýshiniń aktisinde jumysshylarǵa eńbek jaǵdaıynyń zııandylyǵy nemese qaýiptiligi úshin joǵarylatylǵan mólsherde jalaqy belgilenedi. Buǵan qosa, atalǵan sanattaǵy jumysshylarǵa keminde alty kúntizbelik kúnge sozylatyn qosymsha aqy tólenetin jyl saıynǵy eńbek demalysy berilýi tıis.
«Alaıda, kóp jyldardan beri ujymdyq shartta (2014 jylǵy) jáne jumys berýshiniń aktisinde kórsetilgen óndiristiń ereksheligine qaramastan zııandy eńbek jaǵdaıy úshin qosymsha tólemder jáne jyl saıynǵy qosymsha aqy tólenetin eńbek demalystary belgilenbegen. Sáıkesinshe olar tólenbegen jáne qosymsha demalys kúnderi berilmegen. Sondaı-aq, Qazaqstan Respýblıkasy Densaýlyq saqtaý jáne áleýmettik damý Mınıstriniń buıryǵyna sáıkes ár bir aýysymǵa shyqqan jumysshyǵa belgilengen mólsherdegi sút jáne oǵan teńestirilgen tamaq ónimderin berý jónindegi talaptary oryndalmaǵan. Prokýrorlyq qadaǵalaý aktisin qaraý nátıjesimen AQ-da jańa ujymdyq shart bekitilip, onda jumysshylarǵa zııandylyǵy úshin tólenetin qosymsha ústeme aqy bekitildi. Buǵan qosa, jumysshylarǵa emdik-profılaktıkalyq maqsatynda sút ónimderiniń berilýine jáne ýaqytysynda arnaıy kıim-keshekterdiń tabystalýyna qol jetkizilip, jalpy myńdaǵan jumysshylardyń quqyǵy qorǵaldy», - dep málim etti Qyzylorda oblystyq prokýratýrasy.