«Araltuz» ben «Aralsoda» aýrýhanaǵa 50 mln teńge kóleminde kómek kórsetti
Elimizdiń basqa da óńirlerindegideı Aral aýdanynda da koronavırýstyq ınfektsııaǵa, pnevmonııaǵa shaldyqqandardyń sany az emes, bul óz kezeginde medıtsınalyq jabdyqtardyń tapshylyǵyna ákelip soqtyrdy. Osyndaı jaǵdaıda dárigerler belderin jazbaı jumys isteýde. Bul indet qazaqstandyqtardy biriktirdi, árbir adam qoldan kelerlikteı úlesin qosýǵa tyrysyp jatyr.
«Araltuz» AQ men «Aralsoda» JShS basshylyqtary da nemquraıly qaraı almady. Kompanııanyń jeke bıýdjetinen 50 mıllıon teńge kóleminde aqshalaı qarajat bólindi. Aral aýdanynyń provızorlyq statsıonarlarynyń qajettilikteri anyqtalyp, kerekti medıtsınalyq jabdyqtar men materıaldardy satyp alý týraly sheshim qabyldandy.
Qaıyrymdylyq kómek aıasynda «Araltuz» AQ men «Aralsoda» JShS COVID-19 vırýsyna shaldyqqan aýrýlar jatqyzylatyn Aral aýdandyq ortalyq aýrýhanasynyń juqpaly aýrýlar bólimine 19 ottegi kontsentratyn, 200 medıtsınalyq tósek pen tósek-oryn jabdyǵyn, 200 medıtsınalyq qorǵanys quraly men maska jıyntyqtaryn satyp alyp, tabystady. Kómek kóresetýdiń kelesi kezeńinde qosymsha 2 jedel járdem mashınasyn, 100-den astam gaz ballon, sáýlelendirgish, medıtsınalyq fýnktsıonaldy tósek jáne basqa da medıtsınalyq jabdyq pen materıaldardy satyp alý josparlanýda.
Koronavırýs ınfektsııasynyń taralýynyń qıyn kezinde aýrýhanalarǵa qoldaý qajet, al «Araltuz» AQ men «Aralsoda» JShS bolsa múmkindiginshe jedel túrde kómek kórsetýge tyrysyp jatady.