Aralda ushaqtyń qulaýy: oqıǵanyń mán-jaıy anyqtaldy

QYZYLORDA. QazAqparat – Qyzylorda oblysy Aral aýdanynda qulaǵan AN-2 ushaǵyna baılanysty oqıǵanyń mán-jaıy anyqtaldy, dep habarlaıdy QazAqparat tilshisi.

Esterińizge salsaq , búgin tús áletinde sanıtarlyq avıatsııa qyzmetin atqaratyn AN-2 ushaǵy Aral qalasyna jaqyn aýmaqta ornalasqan Altyqudyq degen jerge qulap, tolyǵymen janyp ketken. Atalǵan oryn aýdan ortalyǵynan shamamen 21 shaqyrym qashyqtyqta.

Bul jóninde habarlama oblystyq tótenshe jaǵdaılar departamentine saǵat 12.10-de túsken.

Órt sóndirýshiler oqıǵa ornyna kelgende ushaq tolyqtaı janyp ketken.

«Ekıpaj «Sanavıatsııa» qyzmetiniń tapsyrmasy boıynsha ushyp shyqqan. Keleńsiz jaǵdaı ushaqtyń qoný kezinde tirkelgen. Aýdan aýmaǵynda tuman túsýinen aýa raıynyń qolaısyz bolǵandyǵy anyqtaldy. Qoný barysynda ushaq batpaqqa qulap, aýdarylyp ketken. Ushaq ishinde 1970 jylǵy ekıpaj komandıri, 1992 jylǵy ekinshi pılot jáne 1974 jylǵy dáriger bolǵan. Olardyń barlyǵy aman, eshqandaı zardap shekpegen. Olarǵa medıtsınalyq kómek qajet bolǵan joq. Artynsha órt shyǵyp, ushaq tolyq janyp ketken», - dedi oblystyq tótenshe jaǵdaılar departamenti basshysynyń orynbasary Saıd Moldaqaraev.

Málim bolǵanyndaı, ushaq saǵat 9.30 shamasynda Qyzylorda áýejaıynan tıisti baǵytqa bet alǵan. 1987 jyly shyǵarylǵan áýe tehnıkasy byltyr qarasha aıynda jóndeýden ótkizilip, ushýǵa qaıta ruqsat etilgen.