Aralda Táýelsizdik kúninde birqatar nysan paıdalanýǵa berildi

QYZYLORDA. QazAqparat - Táýelsizdik merekesinde Qyzylorda oblysynda birqatar áleýmettik nysandar paıdalanýǵa berildi, dep habarlaıdy QazAqparat tilshisi.

Oblys ákimi Gúlshara Ábdiqalyqova Aral aýdanynda birqatar nysannyń ashylý rásimine qatysty. Aımaq basshysy aldymen aýdandyq oqýshylar úıin paıdalanýǵa berý rásimine qatysyp, jańa ǵımarattyń jaı-kúıimen tanysty. Oqýshylardyń ıgiligi úshin salynǵan nysannyń ashylýymen quttyqtap, lebizin bildirdi.

«Barlyǵyńyzdy aýdandyq oqýshylar úıiniń ashylýymen quttyqtaımyn. Jańa nysanda ónerli ulandar tárbıelenip, aýdannyń mádenı damýyna zor úles qosady dep senemin. Munda balǵyndar túrli úıirmelerge qatysyp, óz shyǵarmashylyqtaryn shyńdaıtyn bolady» , - dedi oblys ákimi.

Nysannyń qurlysy 2019 jyldyń mamyr aıynda bastalǵan. Syıymdylyǵy 250 balaǵa laıyqtalǵan. Quny 282,1 mln teńgeni quraıdy.

Ǵımarattyń birinshi qabatynda «Bioland», IT baǵytyndaǵy jáne bı úıirmeleri bar. Al ekinshi qabatynda «Sheber qoldar» úıirmesimen, foıede sýretshilermen jas qolónershilerdiń kórmesi jáne akt zaly ornalasqan.

Aımaq basshysy odan keıin Shıjaǵa eldi mekenindegi dárigerlik ambýlatorııanyń ashylý rásimine de qatysty. Jańa medıtsınalyq ǵımarat 15 bólmeden turady. Qazir munda 15 qyzmetker jumys isteıdi. Jańa nysan memlekettik-jekeshelik áriptestik aıasynda boı kótergen.

Munan keıin óńir basshysy Shómish eldi mekenindegi keńeıtilip jáne qaıta jańǵyrtý jumystary júrgizilgen ishki sý jelisin paıdalanýǵa berý rásimine qatysty. Atalǵan sý jelisiniń uzyndyǵy 11,9 shaqyrymdy quraıdy. Aýyz sý júıesi «Óńirlerdi damytý-2020» baǵdarlamasy sheńberinde iske asqan.

Oblys ákimi Gúlshara Ábdiqalyqovanyń Aral aýdanyndaǵy sapary Qamystybas eldi mekeni tusyndaǵy «Batys Eýropa – Batys Qytaı» avtodáliziniń boıynda ornalasqan jeke kásipker Talǵat Jalǵasbekovtiń jol boıǵy qyzmet kórsetý kesheninde qorytyndylandy. Kásipker keshendi 200 mln.teńgege óz qarajaty esebinen salǵan. Munda 80 adamǵa arnalǵan as bólmesi, 10 jatyn bólme jáne namaz oqıtyn oryn bar. Jańa nysan janynan janar maı quıý beketi de ornalasqan. Oblys ákimi kásip ıesin jańa nysannyń ashylýymen quttyqtap, keshen jumysyna sáttilik tiledi.

Sondaı-aq, Qyzylorda oblysynda Meniń týym. Meniń Otanym!» buqaralyq chellendji aıasynda avto jáne velosherý ótti.