Aralda balyq sharýashylyǵy tarıhy murajaıy qundy jádigerlermen tolyqty

ARAL. QazAqparat - Qyzylorda oblysy Aral aýdanynda balyq sharýashylyǵyn tarıhyn nasıhattaıtyn murajaı qundy jádigerlermen tolyqty. Bul murajaı kezinde elimizdiń balyq sharýashylyǵy mınıstri qyzmetin atqarǵan belgili memleket jáne qoǵam qaıratkeri Qudaıbergen Sarjanovtyń qoldaýymen ashylǵan bolatyn, dep habarlaıdy QazAqparat tilshisi.

Murajaı týǵan jerdiń tarıhy men tanymyn aıǵaqtaıtyn, murasyn ulyqtaıtyn mádenı oryn retinde tusaýyn kesken edi. Oǵan Araldyń tolqynynan boıyna rýh sińire bilgen teńizben taǵdyrlas talant ıesi, kezindegi balyq sharýashylyǵy mınıstri, memleket jáne qoǵam qaıratkeri, Aral aýdanynyń qurmetti azamaty Qudaıbergen Sarjanov uıytqy boldy.

Igilikti sharaǵa aýdan ákimi Muhtar Orazbaev arnaıy qatysty. Ol murajaı qoryn jasaqtaýǵa belsene qatysqan Qudaıbergen Sarjanovqa alǵysyn bildirdi.

«Tuńǵysh Prezıdent- Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasy aıasynda «Týǵan jer» baǵdarlamasyn iske asyrýǵa erekshe mán berilgen. Osy baǵytta ashylǵan bul murajaıdyń mańyzy zor. Bul mádenı orynnyń keleshek urpaqqa óz ólkesin tanytý baǵytyndaǵy orny erekshe. Murajaıda asa qundy dúnıeler jınaqtalǵan», - dedi Muhtar Orazbaev.

Shara barysynda Aral aýdandyq atqarý komıtetiniń tóraǵasy, partııa komıtetiniń birinshi hatshysy bolǵan Baltabaı Aqpanbetov pen Qazaqstan Jýrnalıster odaǵynyń múshesi, ardager jýrnalıst Shákirat Dármaǵambetov óz tilektestigin bildirdi.

Óz kezeginde Qudaıbergen Sarjanov rýhanı muralardan syr shertken murajaı jádigerlermen tanystyrdy. Kóptegen qundy dúnıelermen tolyqtyrylǵan murajaı birneshe bólimge toptastyrylǵan.