Aralas mektepterdi kezeń-kezeńimen memlekettik tilde bilim berýge kóshirý kerek - Dınara Nuralıeva
«Búgingi tańda Jambyl oblysynda aralas mektepterde memlekettik tilde bilim beretin birinshi synyptar kóbeıe bastady. Mektep dırektory retinde osy oraıda óz usynysymdy jetkizgim keledi. Eger respýblıkamyzdyń ár óńirinde aralas mektepter kezeń-kezeńimen memlekettik tilde bilim berýge kóshse, sizder qalaı qaraısyzdar?! Bul sheshim barlyq qazaqstandyq balalardy kishkentaı kúninen eshqandaı bólinýge jol bermeı, qazaq tilin jetik meńgerýge naqty qadam bolar edi. «El bolam deseń, besigińdi túze». Bizde bir ǵana ortaq – memlekettik tilimiz, bir ǵana – ultymyz, bir ǵana – Otanymyz bolýy tıis!», - dedi ol Elbasy Nursultan Nazarbaevtyń tóraǵalyǵymen ótken Qazaqstan halqy Assambleıasy keńesiniń otyrysynda.
Ákesi – dúngen, anasy – uıǵyr, arǵy atalary – orys, ózbek, tatar jáne basqa da birneshe ulttan taraıtyn Dınara Nuralıeva ózi sııaqty azamattardyń tólqujatyna «qazaq» dep jazatyn ýaqyttyń kelgenin aıtady.
«Qazirgi ýaqytta Qazaqstanda boıynda 7-8 etnostyń qany bar men sııaqty júz myńdaǵan adam bar. Múmkin osyndaı azamattardy tólqujatyna «qazaq» dep jazatyn ýaqyt kelgen shyǵar? Biz árqashan tatýlyq pen birlikte ómir súrip kelemiz. Ortaq úıimizde bir úzim nandy bólip jep otyrǵan jaıymyz bar. Basty baılyq – turaqtylyq ekenin esten shyǵarmaýymyz qajet. Biz árdaıym birge bolsaq, áli talaı asýlardy baǵyndyramyz», - dedi mektep dırektory.