Aral teńiziniń soltústik bóligin damytý jobasy qolǵa alynbaq

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Serikqalı Brekeshev Úkimet otyrysynda eldegi ózen-kólderdi tazartý jumystary týraly aıtyp berdi, dep habarlaıdy QazAqparat tilshisi.

Mınıstrdiń aıtýynsha, «Jasyl Qazaqstan» ulttyq jobasynda elimizdiń sý obektileriniń ekojúıesin saqtaý jáne sýdy únemdi paıdalaný arqyly ónimdilikti arttyrý mindeti jazylǵan.

«Onyń sheńberinde kanaldardy, sonyń ishinde Balqash kóliniń basseıninde rekonstrýktsııalaý jáne jóndeý jumystary júrgizildi. Syrdarııa ózeniniń 50 shaqyrymy tazartyldy. Byltyr 22 arnanyń sý esebi tsıfrlandy. Osy jyly 89 kanaldy tsıfrlandyramyz. Bul sharalar Balqash kóline jylyna keminde 12 tekshe kılometr sý aǵymyn qamtamasyz etti, Soltústik Aral teńiziniń kólemi 20,6 tekshe kılometr deńgeıinde saqtalyp, sýarý kezinde sý shyǵyny 200 mln tekshe metrge qysqartyldy, kólemi 230 mln tekshe metrge sý qosymsha jınaqtaldy», - dedi S. Brekeshev Úkimettiń búgingi otyrysynda.

Araldy saqtaý úshin qazirgi ýaqytta «Aral teńiziniń soltústik bóligin damytý jáne qalpyna keltirý» jobasynyń tehnıkalyq-ekonomıkalyq negizdemesi ázirlenip jatyr.

Sonymen birge Aqtóbe oblysyndaǵy Shalqar kólin tazartý jumysy jalǵasýda.

Buǵan deıin Ekologııa mınıstri Qazaqstanda sý únemdeý úshin qandaı shara jasalatynyn aıtqan edi. Elimizde uzyndyǵy 21,5 myń shaqyrymǵa jýyq 3,5 myń magıstraldi sý kanaly bar. Onyń 9 myń shaqyrymyn qaıta qurý boıynsha jumystar josparlanǵan.

Foto: aralregioncharity.org