Aral kolledjine oqytýshy bolý úshin 400 myń teńge para talap etilgen
11:30, 15 Qańtar 2020
QYZYLORDA. QazAqparat – Qyzylorda oblysy bilim basqarmasyna qarasty Aral kolledji dırektorynyń orynbasary sybaılas jemqorlyq jasady degen kúdikke ilindi. Bul týraly QazAqparat QR Sybaılas jemqorlyqqa qarsy is-qımyl agenttigine silteme jasap habarlaıdy.
«Qyzylorda oblysynyń sybaılas jemqorlyqqa qarsy qyzmeti sybaılas jemqorlyq quqyq buzýshylyq jasady dep kúdikke ilingen Qyzylorda oblysy bilim basqarmasynyń «Aral kópsalaly kolledji» MKQK dırektorynyń orynbasaryna qatysty sotqa deıingi tergeýdi bastady», delingen habarlamada.
Baspasóz qyzmetiniń málimetinshe, ol atalǵan kolledjge oqytýshy qyzmetine jumysqa turǵyzý úshin azamatty «Qyzylorda oblysy bilim basqarmasy» MM-niń laýazymdy tulǵalaryna 400 myń teńge kóleminde para berýge ıtermelegeni úshin kúdikke ilindi.
«Kináni moıyndaýǵa jáne kúdikti men onyń qorǵaýshysynyń kelý mindettemesin berýge baılanysty protsessýaldyq ustaý qoldanylǵan joq.
Kúdiktiniń kinásiniń deńgeıi týraly túpkilikti sheshimdi sot shyǵarady», delingen habarlamada.