Aral apaty aımaqtyq ta, jahandyq ta deńgeıde sheshýdi talap etetin ózekti másele - senator

ASTANA. QazAqparat – Aral apaty aımaqtyq ta, jahandyq ta deńgeıde sheshýdi talap etetin qazirgi zamandaǵy ózekti máselelerdiń biri retinde BUU-da kóterilgen. Bul týraly Parlament Senaty tóraǵasynyń orynbasary Asqar Shákirov «Aral óńirindegi qorshaǵan orta jáne halyqtyń densaýlyǵy» halyqaralyq ǵylymı-praktıkalyq konferentsııada aıtty, dep habarlaıdy QazAqparat Palatanyń baspasóz qyzmetine silteme jasap.

«Qazaqstan men Ózbekstan Aral teńizi basseınindegi ekologııalyq jáne áleýmettik-ekonomıkalyq daǵdarysty eńserýde birlesken kúsh-jiger jumsap keledi. Eki eldiń prezıdentteri Aral óńirindegi ózekti máselelerdi jedel sheshýdi, transshekaralyq sý resýrstaryn utymdy paıdalanýdy jáne qorshaǵan ortany qorǵaýdy júıeli túrde aıtyp otyr. Ótip jatqan forýmdy biz eki el, onyń ishinde parlamenttik baılanystar aıasynda júrgizilip jatqan jumystardyń zańdy jalǵasy retinde qarastyramyz», - dedi A. Shákirov.

Konferentsııaǵa qatysqan Áleýmettik-mádenı damý jáne ǵylym komıtetiniń hatshysy, depýtat Aqmaral Álnazarova da Aral óńirindegi klımattyń áserin jáne tabıǵı ortanyń azyp-tozýyn azaıtý maqsatynda Syrdarııa ózeni men Soltústik Aral teńizin saqtaý máselelerin sheshýde jalpyǵa birdeı qabyldanǵan halyqaralyq konventsııalar men standarttarǵa sáıkes túbegeıli qadamdar qajettigin atap ótti.

«Ekonomıkanyń barlyq salalarynda klımattyń ózgerýine beıimdelý sharalaryn qabyldaý qajet, ásirese aýyl sharýashylyǵynda sý únemdeý tehnologııasy men ylǵaldy az qajet etetin daqyldarǵa kóshý qajet. Taıaý jyldarda qurǵap qalǵan teńiz túbiniń jalańash jerlerine orman ósirý, mal sharýashylyǵyn damytý úshin sýy ózdiginen shyǵatyn uńǵymalardyń aınalasynda oazıs júıesi jasalýy qajet. BUU qamqorlyǵy aıasynda tereń zertteýler júrgizip, tıisti usynymdar ázirlenýi kerek», - dep atap ótti senator.

Konferentsııaǵa Ózbekstan Respýblıkasy Olıı Májilisi Senaty tóraǵasynyń orynbasary Sodık Safoev, DDU Eýropalyq bıýrosynyń basshysy Hans Klıýge, USAID jobasynyń jetekshisi Ekaterına Strıkeleva qatysyp, sóz sóıledi.

Buǵan deıin habarlaǵanymyzdaı, Senattyń jalpy otyrysynda depýtat Murat Baqtııaruly « eger shuǵyl túrde sharalar qabyldanbasa, Kishi Araldan aıyrylyp qalýymyz múmkin» dep másele kóterdi.