«Araq ishkenge aıyppul salynsa...» - baspasózge sholý

ASTANA. QazAqparat - «QazAqparat» halyqaralyq aqparat agenttigi 27 tamyz, sársenbi kúni jaryq kórgen respýblıkalyq buqaralyq aqparat quraldarynda jarııalanǵan ózekti materıaldarǵa sholýdy usynady.

***

«Egemen Qazaqstan» gazetiniń búgingi sanynda «Aqıqatty aıqyndar sát týyp otyr» degen kólemdi maqala berilgen. Keshe Belarýs astanasy Mınskide Keden odaǵy elderiniń basshylary, ıaǵnı Qazaqstan, Belarýs, Reseı memleketteriniń prezıdentteri Nursultan Nazarbaev, Aleksandr Lýkashenko, Vladımır Pýtın, sondaı-aq Ýkraına basshysy Petr Poroshenko men Eýropalyq odaqtyń ókilderi bas qosty. Úlken mańyzy bar bul jıynǵa Eýropalyq odaqtyń syrtqy ister jáne qaýipsizdik saıasaty máseleleri boıynsha joǵarǵy ókili, Eýropalyq komıssııa tóraǵasynyń orynbasary Ketrın Eshton, Eýropalyq odaqtyń energetıka máseleleri boıynsha joǵarǵy ókili, Eýropalyq komıssııa tóraǵasynyń orynbasary Gıýnter Ettınger jáne Eýropalyq odaqtyń saýda máseleleri boıynsha joǵarǵy ókili Karel de Gıýht qatysty. Aýqymdy pishimdegi jıyn bastalmas buryn Qazaqstan Prezıdenti Nursultan Nazarbaev Ýkraına Prezıdenti Petr Po­ro­shenkomen kezdesti. Kezdesýde Nursultan Nazarbaev pen Petr Poroshenko ekijaqty saýda-eko­nomıkalyq yntymaqtastyq­ty jandandyrýǵa baǵyttalǵan ma­ńyzdy qadamdardy qarastyrdy.

Kezdesýde Nursultan Na­zar­baev tutastaı Ýkraınaǵa, Ýkraına ekonomıkasyna qoldaý kómek kórsetý qajettigin aıtty. «Qazaqstan Ýkraınanyń ońtústik-shyǵysyna gýmanıtarlyq kómek kórsetýge daıyn. Eger de, gýmanıtarlyq konvoı bolsa, biz bul máselege qazaqstandyq Qyzyl krest tetigin iske qosýǵa ázirmiz. ıAǵnı biz eger, qajet bolsa, óz elimizdiń tarapynan osyndaı eleýli qoldaý kórsetýge daıyn ekenimizdi aıtqymyz keledi», dedi Qazaqstan Prezıdenti.

Sondaı-aq, Memleket basshysy ekijaqty kezdesýde Ýkraınada qalyptasqan shıelenisti jaǵdaı beıbit túrde sheshiletinine úmitti ekenin bildirdi. «Eger osyndaı jaǵdaı odan ári jalǵasa beretin bolsa, bul aýqymdy ǵalamdyq qaqtyǵystarǵa alyp kelýi múmkin. Sondyqtan, bizdiń ustanymymyz, meniń jeke ustanymym - bir jerge toqaılasatyn núkteni tabý, soǵys órtin sóndirý, eldi qalpyna keltirý», dedi óz sózinde Qazaqstan Prezıdenti.

***

«Salaýatty ómir salty degen uǵym ádemi-aq. Qazaqqa keregi osy. Osy úshin ómirlik kúresip ótsek, ol - jón is. Jalpy alǵanda, kúresti baıaǵyda bastaǵanbyz. Biraq nátıje kóńil kónshiterlikteı emes. Sebep ne? Qazaqstanda maskúnemdikke qarsy kúres bastalǵannan beri, baıqaýy­myzsha, biraz qatelikterge jol berdik. Spırtti ishimdikter óndiretin ká­sip­oryn­darǵa salynatyn salyqty ósirdik. Sóıtip, araqtyń baǵasyn ósirdik. Ony táýliktiń belgili bir mezgilinde arnaıy ruqsat etilgen jerlerde ǵana satý zań­dastyryldy. Sonda da ishilip jatyr. Óndiris azaıǵandaı, óıtkeni odan bıýd­jetke túsetin kiris azaıdy ǵoı. Biraq jalpy aınalymdaǵy, ıaǵnı óndiriletin spırtti ishimdik mólsheri azaıǵan joq, ishetinder sany kemigen joq. Bar bol­ǵany memleket esepteı alatyn spırtti ishimdikter óndirisi azaıdy. Onyń esesin memlekettik qyzmetter esepteı almaı­tyn jerlerdegi spırtti ishimdik óndirisi ulǵaıdy. Memleket qazynasyna túsetin qarajattyń belgili bir bóligi pysyqaı­lardyń qaltalaryna túsip ketti»,-dep jazady «Aıqyn» basylymy búgingi sanyndaǵy «Araq ishkenge aıyppul salynsa...» atty maqalasynda.

Osy gazette QR Ortalyq saılaý komıssııasynyń hatshysy Baqyt Meldeshevpen aradaǵy suhbat aldaǵy Senat depýtattarynyń saılaýy tóńireginde órbigen. «Iá, 2008 jyldyń 4 qazanynda saı­lanǵan senatorlardyń alty jyldyq óki­lettik merzimi 2014 jyldyń 9 jeltoq­sa­nynda aıaqtalatyndyqtan, Parlamenttiń joǵarǵy palatasynyń 16 depýtaty qaıta saılanady. Elbasy bıylǵy jyldyń 1 qa­zanyna Parlament Senatyna saılaý óte­tindigin jarııalaǵaly beri, Ortalyq saılaý komıssııasy jer-jerdegi aýmaqtyq saılaý komıssııalarymen birlesip saılaý protse­dýralarynyń zań sheńberinde ótýin qamta­masyz etýde. Búgingi tańda Ortalyq saılaý komıssııasy da, naýqanǵa tartylyp otyr­ǵan aýmaqtyq saılaý komıssııalary da bar­lyq qajetti materıaldyq-tehnıkalyq jáne qarjylyq resýrstarmen qamtamasyz etilgen. Senat depýtattaryn saılaýdy ót­kizýge 2014 jyly respýblıkalyq bıýd­jet­ten jalpy kólemi 136 mıllıon teńge bó­lingendigi týraly buǵan deıin de BAQ-ta jarııalanǵan bolatyn. Qajetti ádistemelik jáne normatıvtik baza da qalyptas­ty­rylǵan. Saılaý naýqanyn uıymdastyrý, ótkizý jáne aqparattyq qoldaý sharalary da belgilengen merzimderde júzege asy­rylýda»,-deıdi B. Meldeshev. Bul suhbat « Kandıdattardyń ortasha jasy - 53,5 » degen taqyryppen berilgen.

***

«Ekspress-K» basylymynyń búgingi sanynda « Smert na brýdershaft » atty materıal basyldy. Kókshetaýda qaıǵyly oqıǵa oryn aldy. Qala turǵyny alkogoldik ishimdik ishken azamatty kópqabatty úıdiń balkonynan sekirmek kezinde ustap qalmaq bolǵan, alaıda bul áreketi júzege aspady. Nátıjesinde ekeýi de jetinshi qabattan tómen qulap tústi. Bul oqıǵaǵa qarsy úıde turatyn er azamat kýá bolǵan. Ol oqıǵa ornyna «jedel járdem» shaqyrtqan eken. Dárigerler 30 jasar Ivan Bondarev pen 29 jastaǵy Rýslan Qabdylmanovty aýrýhanaǵa jetkizedi. Biraq ta olar alǵan aýyr jaraqqatarynan kóz jumdy. Quqyq qorǵaý organdarynyń málimetinshe, qurylysta birge jumys istegen atalǵan eki adam sol kúni páterde spırttik ishimdik ishken kórinedi.