Arab memleketteri lıgasynyń AÓSShK VI Sammıtine qatysatyny rastaldy - QR SІM

ASTANA. QazAqparat – Qazaqstannyń Egıpettegi Elshisi Qaırat Lama Sharıf Arab memleketteri lıgasy Bas hatshysynyń saıası máseleler jónindegi orynbasary, Elshi Haled ál-Zavadımen kezdesti, dep habarlaıdy QazAqparat QR Syrtqy ister mınıstrligine silteme jasap.

Kezdesý barysynda Arab memleketteri lıgasy (AML) Bas hatshysynyń Qazaqstan Respýblıkasynyń tóraǵalyǵymen ótetin Azııadaǵy ózara is-áreket jáne senim sharalary jónindegi keńestiń (AÓSShK) 6-shy sammıtine qatysýyn daıyndaý máseleleri sóz boldy.

Qazaqstandyq dıplomat bıyl BUU Bas Assambleıasynyń 47-shi sessııasynda AÓSShK ıdeıasy usynylǵanyna 30 jyl tolatynyn málimdedi. Búgingi tańda AÓSShK quramyna 27 Azııa eli kiredi, olardyń 6-aýy – Arab memleketteri (Bahreın, Egıpet, Iordanııa, Palestına, Katar, BAÁ). 2021 jyly Kýveıt AÓSShK-ke múshe memleket retinde kirýge ótinish berdi. Atalǵan eldiń qosylýy halyqaralyq forýmnyń shekaralary men geografııasy keńeıtedi.

Q. Lama Sharıf osy dıalog alańyn tolyqqandy halyqaralyq uıymǵa aınaldyrý boıynsha júrgizilip jatqan jumystyń ózektiligin aıtyp, usynylyp otyrǵan transformatsııa Azııanyń jahandyq isterdegi jańa rólin kórsetetine nazar aýdardy.

Óz tarapynyn H. ál-Zavadı forýmnyń óńir elderi arasyndaǵy kópjaqty ózara is-qımyldy qamtamasyz etýdegi joǵary tıimdiligin atap ótti jáne AÓSShK-te baqylaýshy mártebesine ıe AML-dyń uıymmen ózara is-qımyldy odan ári tereńdetýge múddeliligine nazar aýdardy. Sonymen qatar, ol arab memleketteriniń róline erekshe toqtalyp, Arab memleketteri lıgasyna múshe 22 arab eliniń 14-i Azııa kontınentiniń ókili, onyń 6-y Konferentsııanyń tolyqqandy múshesi ekenin atap ótti.

Kezdesý barysynda H. ál-Zavadıdiń aıtýynsha, «yntymaqtastyqqa biregeı yntalandyrýlar týdyratyn» turaqty alań retinde Danyshpandar keńesi men Analıtıkalyq qurylymdar forýmyn qurý sııaqty bastamalardy talqylaýǵa erekshe kóńil bólindi. Bul turǵyda AÓSShK men AML hatshylyqtary arasyndaǵy baılanystardy arttyrý tetikteri, sondaı-aq birlesken is-sharalardyń tıimdiligin arttyrý joldary qarastyryldy.

Talqylaý nátıjesi retinde úzdik tájirıbe almasý men kópjaqty yntymaqtastyqtyń áleýetin ashý maqsatynda birqatar halyqaralyq is-sharalardy birlesip daıyndaý jáne ótkizý týraly ýaǵdalastyqqa qol jetkizildi.

Aıta ketsek, 12-13 qazanda Qazaqstan elordasynda AÓSShK VI Sammıti ótip, onda 27 múshe eldiń memleket jáne úkimet basshylary Keńesti tolyqqandy halyqaralyq aımaqtyq uıymǵa aınaldyrý qadamdaryn iske qosady.

Foto: QR Syrtqy ister mınıstrligi