Arab ınvestorlary yntymaqtastyq týraly Qazaqstan usynystaryn zerdelep jatyr

ASTANA. QazAqparat –Arab ınvestorlary yntymaqtastyq týraly Qazaqstan usynystaryn egjeı-tegjeıli zerdelep bolǵan soń, olardy iske asyrýǵa kóshpek. Bul týraly búgin QR Premer-Mınıstri Álıhan Smaıylovtyń Birikken Arab Ámirlikteri Ortalyq bankiniń tóraǵasy Haled Muhammed Salem Balama bastaǵan BAÁ delegatsııasymen kezdesýinde aıtyldy, dep habarlaıdy QazAqparat primeminister.kz saıtyna silteme jasap.

Qatysýshylar ınvestıtsııa tartý, eki eldiń isker toptarynyń baılanystaryn nyǵaıtý jáne bank salasyndaǵy yntymaqtastyq máselelerin talqylady.

Álıhan Smaıylov óziniń BAÁ-ge taıaýdaǵy resmı saparynyń qorytyndysy boıynsha eki el arasynda kóptegen vedomstvoaralyq jáne kommertsııalyq qujattarǵa qol qoıylǵanyn, ınvestıtsııalyq yntymaqtastyqty odan ári arttyrý boıynsha ýaǵdalastyqtarǵa qol jetkizilgenin eske saldy.

«Biz ózara is-qımylǵa úlken mańyz beremiz jáne ekijaqty qarym-qatynastar deńgeıin arttyrýǵa nıettimiz», — dedi Premer-Mınıstr.

Óz kezeginde Haled Muhammed Salem Balama qazirgi ýaqytta arab ınvestorlary yntymaqtastyq týraly usynystardy egjeı-tegjeıli zerdelep jatqanyn, sodan keıin olardy iske asyrýǵa kóshetinin atap ótti.

«Búgin ınvestıtsııalyq yntymaqtastyq úshin jaqsy múmkindikter ashylyp jatyr. Qazaqstan Úkimetine osy baǵytta kórsetilip jatqan qoldaý úshin alǵys bildirgim keledi», — dedi BAÁ Ortalyq bankiniń basshysy.

Aıta keteıik, BAÁ delegatsııasynyń quramynda buǵan deıin Qazaqstanda ınvestıtsııalyq jobalardy iske qosýǵa qyzyǵýshylyq tanytqan «Mubadala» jáne «ADQ» iri kompanııalarynyń ókilderi de bar.

Foto: primeminister.kz