Ár salada jetistikke jetken Aqmola oblysynyń belsendi jastary marapattaldy
Kókshetaý qalasyndaǵy Neke saraıynda ótken sharada aımaq basshysy jastardy árdaıym qoldaıtynyn aıta otyryp, jastardy tolǵandyryp otyrǵan ózekti máselelerin ózderinen surap bildi.
«Táýelsizdik rýhymen ósip kele jatqan búgingi jas býyn - erteńgi úmitimiz, senimdi tiregimiz. Jastar - el damýynyń negizgi faktory. Elbasynyń «Rýhanı jańǵyrý» men «Uly dalanyń jeti qyry» maqalalary osyǵan baǵyttalǵan. Qazaqstannyń bolashaǵy berik jáne damyǵan 30 eldiń qataryna qosylýyna Aqmola jastarynyń úlken úles qosatynyna senimdimin», - dedi oblys ákimi.
- Elbasy Nursultan Nazarbaev Jastar jylynyń ashylýynda «Jastar - qazirgi zamanǵy álemde bizdiń elimizdiń báskege saı bolýynyń basty faktory» - degen edi. Memleketimizdiń bolashaǵy úshin jastarǵa zor senim júktelip otyr. Búgingi kúni Aqmola oblysynda 750 myń turǵyn bolsa, sonyń 20 paıyzdan astamy jastar. Qazirgi aqmolalyq jastar ár salada tabysty eńbek etýde. Olarǵa bılik tarapynan barlyq jaǵdaı jasalýda.
Kezdesýde «Jas sarbaz» balalar men jasóspirimderdiń áskerı-patrıottyq qozǵalysy» respýblıkalyq qoǵamdyq birlestigi oblystyq fılılynyń tóraǵasy Orynbek Saǵıdolla, «Shaǵyn jáne orta bıznesti damytýǵa qosqan úlesi» oblystyq baıqýynyń jeńimpazy Tımýr Sársenbaev, «World skills Kazakhstan - 2018» 4-shi ulttyq chempıonatynyń alty medal ıegeri, Kókshetaý qalasyndaǵy joǵary tehnıkalyq kolledjdiń 3-shi kýrs stýdenti Maksım Sokolov, «Zhas Project» jastar korpýsyn damytý boıynsha jobanyń óńirlik úılestirýshisi Tımýr Ysqaqov, oblys ortalyǵyndaǵy ІT mektep-lıtseıiniń 10-shy synyp oqýshysy, muǵalimder úshin testileý saıtynyń avtory Janarys Saıranbekov, Kókshetaý tehnıkalyq ınstıtýtynyń kýrsanty Ádilet Serik, «Rýh-aldaspan» qoǵamdyq birlestiginiń tóraǵasy Mergen Toqsanbaı, Shoqan Ýálıhanov atyndyǵy Kókshetaý ýnıversıtetiniń 4-shi kýrs stýdenti, «Máńgilik el jastary - ındýstrııasy» jobasyna qatysýshy Ádilet Qurmanbek, «Fenıks» volonterler ortalyǵy» óńiraralyq qoǵamdyq uıymynyń tóraıymy Aıym Kúshenova, «Shańyraq» agroónerkásiptik holdınginiń basshysy Indıra Sádenova qatysty.
Basqosýda óńir jastary ózara pikir almasyp qana qoımaı, elimizdegi jastardyń búgingi jaı-kúıi týraly sóz qozǵap, oblys ákimine jastardy jumyspen qamtý, jastardyń jobalaryn qoldaý boıynsha birqatar usynys-tilekterin jetkizdi. Osy oraıda, oblys ákimi Málik Myrzalın jastardyń aıtqan usynystary men saýaldaryn negizge ala otyryp, aldaǵy ýaqytta ózekti máselelerdi sheshýge, sonymen qatar, jastar arasynda kásipkerlikti damytý úshin jaǵdaı jasaý memlekettik jastar saıasatynyń negizgi baǵyty retinde qarastyrylatynyn tilge tıek etti. Sondaı-aq, Kókshetaý qalasynda «Rýhanı jańǵyrý» saraıy jáne kópbeıindi sport kesheni salynatynyn jetkizdi.
Sharada ár salada joǵary jetistikterge qol jetkizip, kózge túsken belsendi jastarǵa sertıfıkat jáne baǵaly syılyqtar tapsyrylyp, Alǵys hattarmen marapattaldy. Shara jergilikti shyǵarmashylyq jastardyń kontserttik baǵdaralamasyna ulasty.