Ár otbasynda kók baıraǵymyz tursa, óte jarasymdy bolady – Qasym-Jomart Toqaev

ASTANA. QazAqparat – Ár otbasynda kók baıraǵymyz tursa, óte jarasymdy bolatyny sózsiz. Bul týraly búgin Respýblıka kúnine oraı memlekettik nagradalar men syılyqtar tapsyrýǵa arnalǵan saltanatty sharada Prezıdent Qasym-Jomart Toqaev aıtty, dep habarlaıdy QazAqparat Aqordaǵa silteme jasap.

«Men búgingi saltanatty jıynǵa túrkistandyq Muhamed Qanseıitti arnaıy shaqyrdym. Ol qaýip-qaterge qaramastan, Týymyzdy jáne Eltańbamyzdy órtten aman alyp shyqty. Osyndaı azamattardyń arqasynda memlekettiligimizdiń tuǵyry nyǵaıa túsedi. Biz olardy jastarǵa úlgi-ónege etýimiz kerek. Otanshyldyq urandaǵan sózden emes, naqty isten kórinedi. Azamattarymyz elimizdiń damýyna tabandy eńbegimen úles qosady. Sondaı-aq qasterli Otanymyzdyń tutastyǵyn erligimen nyǵaıtatyn azamattar da az emes. Keıbir elderdiń turǵyndary óz rámizderin erekshe qadirlep, barlyq jerde asqaqtatyp júredi», - dedi Memleket basshysy.

Q.Toqaev Qazaqstanda memlekettik rámizderdi paıdalaný erejesi ózgertilgenin eske saldy.

«Ózderińizge málim, meniń tapsyrmam boıynsha elimizde memlekettik rámizderdi paıdalaný erejesi ózgertildi. Árbir azamatymyz qasterli Otanymyzǵa degen súıispenshiligin memlekettik rámizderge qurmeti arqyly kórsete alady.

Qazir baıraǵymyzdy qoǵamdyq jerlerde jáne jekemenshik oryndarda qoıýǵa esh tyıym joq», - dedi Prezıdent.

Osy oraıda, Memleket basshysy ár otbasynda elimiz Týy tursa, jarasymdy bolatynyn jetkizdi.

«Biz dombyraǵa ár qazaqtyń tórinen oryn bar deımiz. Bul - durys. Sol sııaqty elimizdiń ár otbasynda kók baıraǵymyz tursa, óte jarasymdy bolatyny sózsiz.

Bizdiń týymyzda halqymyzdyń búkil rýhy kórinis tapqan. Oǵan eldiń tereń tarıhy, salt-dástúri, mádenıeti, bir sózben aıtqanda, ult qundylyqtarynyń barlyǵy syıyp tur», - dedi Qasym-Jomart Toqaev.