«Ár otbasynan bir aǵash»: Qazaqstanda jańa chellendj ótkizý usynyldy

NUR-SULTAN. QazAqparat – Kóktem kelgende aǵash kóshetterin otyrǵyzý naýqany bastalatyny aıan. Osy oraıda elimizdiń mádenıet jáne sport mınıstrligi kógaldandyrý jumysyna búkil el bolyp jumylýdy usynyp otyr, dep habarlaıdy QazAqparat tilshisi.

«Naýryz tazalyq pen ekologııaǵa qamqorlyq merekesi. Bul áleýetti aýqymdy ekologııalyq aktsııalar men jalpy óskeleń urpaqty ekologııalyq tárbıeleý úshin paıdalaný qajet. Osy kúni búkil el boıynsha jappaı aǵash otyrǵyzý jáne eldi mekender men aýlalardyń aýmaqtaryn tazartý boıynsha «Taza tabıǵat» respýblıkalyq aktsııasy bastalady», - dedi QR Mádenıet jáne sport vıtse-mınıstri Nurǵısa Dáýeshov Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, el boıynsha aǵash otyrǵyzý ár óńirdegi aýa raıyna baılanysty júredi.

«Sonymen bir mezgilde búkil el boıynsha áleýmettik jelilerde «Ár otbasynan bir aǵash» chellendjin ótkizý usynylady. Aǵash otyrǵyzý aýa raıynyń jaǵdaıyna qaraı júrgiziledi. ıAǵnı olaıly jyly kúnder keıinirek keletin aımaqtarda aktsııany da keıinirek uıymdastyrýǵa jol beriledi», - deıdi ol.