Ár óńirge arnalǵan asfaltbeton qospalarynyń jekelegen quramdary jasalady - Qaıyrbek Óskenbaev

ASTANA. QazAqparat – Ár óńir úshin jol tósemderiniń úlgilik konstrýktsııalary jasalady. Bul týraly Májilistegi Úkimet saǵatynda Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

«Memleket basshysynyń tapsyrmasyn oryndaý aıasynda mınıstrlik avtojol salasyn reformalaý boıynsha júıeli jumys júrgizip jatyr. Avtojol jobalaryn iske asyrý kezinde «sannan sapaǵa» qaǵıdaty qoldanylatyn bolady. Avtomobıl joldarynyń sapasyn arttyrý maqsatynda qoldanystaǵy zańnamaǵa tıisti baǵyttar boıynsha túzetýler paketi ázirlendi», - dedi Q. Óskenbaev.

Onyń aıtýynsha, Qazaq jol ǵylymı-zertteý ınstıtýty bazasynda jańa tehnologııalar men jol-qurylys materıaldarynyń biryńǵaı bazasy quryldy.

«Qazir karerler, bıtým zaýyttary materıaldarynyń sapasy, sondaı-aq jańa tehnologııalar, klımat erekshelikteri, geologııalyq jáne gıdrogeologııalyq derekter boıynsha aqparat jınaqtalyp jatyr. Atalǵan ınstıtýt joldardaǵy kólik qozǵalysy qarqyndylyǵyn, eseptik júktemelerdi eskere otyryp, ár óńir úshin jol tósemderiniń úlgilik konstrýktsııalaryn qalyptastyratyn bolady», - dedi mınıstr.

Sonymen qatar, vedomstvo basshysy ár óńir úshin asfaltbeton qospalarynyń, bıtýmnyń, qıyrshyq tastyń jekelegen quramdary qalyptastyrylatynyn aıtty.