Ár óńirde IT mektepter bolýy tıis – Álıhan Smaıylov

ASTANA. QazAqparat – Úkimet basshysy Álıhan Smaıylov otandyq IT salasyn damytýdaǵy kedergilerdi atady, dep habarlaıdy QazAqparat tilshisi.

«Bilim berý isi men IT-ınfraqurylymdy durys, saýatty uıymdastyra bilý qajet. Biz jahandyq IT-naryqtyń tolyqqandy múshesi bolýǵa umtylýymyz kerek. Ol úshin árbir óńirde óz IT-haby men zamanaýı IT-mektepter bolýy tıis. Alaıda, áli kúnge deıin kóptegen óńirde tsıfrlyq ınfraqurylym joq. Mamandar da joqtyń qasy. Ázirge óńirler bul máselege tıisti kóńil bólip otyrǵan joq. Bul – árbir ákimniń mindeti. Degenmen, tabysty mysaldar da bar. Atap aıtqanda, Almaty jáne Qaraǵandy oblystarynda óńirlik IT-habtar men mektepter jumys isteıdi», - dedi Álıhan Smaıylov Úkimet otyrysynda.

Úkimet basshysynyń aıtýynsha, ońtaıly tájirıbeni basqa óńirlerge de keńinen taratý qajet.

«Sondaı-aq, startap-jobalardy damytý máselesinde suraqtar kóp. Bastapqy kezeńde olardy qoldaýǵa kóńil bólingenmen, ári qaraı bıznesti keńeıtýge qarajat tabylmaı qalady. Onyń sońy jobanyń orta jolda toqtap qalýyna ákeledi. Munyń barlyǵy IT-ındýstrııanyń damýyna kedergi keltiredi. Salanyń eksporttyq áleýeti joǵalady. Buǵan iri bıznesti, bankter men venchýrlyq qorlardy jáne basqa da quraldardy tartý qajet. Biz qolda bar barlyq múmkindikter men resýrstardy paıdalanýymyz kerek», - deıdi ol.