Ár oblysta balalardy psıhologııalyq qoldaý ortalyqtary ashylady

<p>2025 jylǵa deıin ár oblysta Balalarǵa arnalǵan psıhologııalyq qoldaý ortalyqtary ashylady. Bul týraly QR Premer-Mınıstri Álıhan Smaıylov aıtty, dep habarlaıdy Kazinform.</p>

«Qazirdiń ózinde otbasylyq-turmystyq zorlyq-zombylyqqa qatysty quqyqbuzýshylyq tómendegeni baıqalady. Degenmen, bul máselede jaǵdaı áli de kúrdeli. Jyl basynan beri osyndaı faktiler boıynsha polıtsııaǵa 74 myńnan astam ótinish kelip túsken. Ákimshilik qamaýǵa alynǵandar sany 2 esege kóbeıdi. Óńirlerde otbasyǵa qoldaý kórsetetin 70-ke jýyq ortalyq quryldy. Onda zardap shekkenderge medıtsınalyq, psıhologııalyq jáne quqyqtyq kómek kórsetiledi», - dedi Á. Smaıylov

Alaıda Úkimet basshysy bul ortalyqtardyń jetkiliksiz ekenin aıtty. Aldaǵy 3 jylda qosymsha osyndaı 97 ortalyq ashý kózdelip otyr. Qazirgi ýaqytta olardyń qyzmetin júıege keltirý jumystary júrip jatyr.

«Bul ortalyqtardy tıisti kadrlarmen qamtý máselesin de sheshý qajet. Taldaý kórsetkendeı, turmystyq quqyqbuzýshylyqtardyń jartysy mas kúıde jasalady. Іshimdik ishken buzaqylar úshin Ýaqytsha beıimdeý jáne detoksıkatsııa ortalyqtary men Ákimshilik qamaýǵa alynǵandardy arnaıy qabyldaý oryndary jumys isteıdi. Biraq, onda da oryn tapshylyǵy bar. Turmystyq zorlyq-zombylyqqa tap bolǵan otbasylarǵa júıeli túrde psıhologııalyq kómek berý jumystary júrgizilmeıdi», - dedi Premer-Mınıstr.

Á. Smaıylov Oqý-aǵartý mınıstrligine 2025 jylǵa deıin ár oblysta Balalarǵa arnalǵan psıhologııalyq qoldaý ortalyqtaryn ashý josparyn ázirleýdi tapsyrdy.
Óńir ákimdikteri Mádenıet, Іshki ister jáne Densaýlyq saqtaý mınıstrlikterimen birge jańa Otbasyn qoldaý ortalyqtaryn, sondaı-aq narkologııalyq mekemelerdi ashýdy qamtamasyz etýi qajet.

«Densaýlyq saqtaý mınıstrligi psıhoterapevter men narkologtardy daıarlaýǵa arnalǵan memlekettik tapsyrysty ulǵaıtý máselesin pysyqtaýy kerek. Al Іshki ister, Mádenıet mınıstrlikteri turmystyq zorlyq-zombylyq úshin jaýapkershilikti qatańdatýǵa qatysty túzetýlerdi aýqymdy túsindirý jumystaryn uıymdastyrýy qajet», - dedi Á. Smaıylov.

Buǵan deıin QR Іshki ister mınıstriniń orynbasary Igor Lepeha Qazaqstanda turmystyq zorlyq-zombylyq jazasy qalaı kúsheıtilgenin aıtyp bergen edi.

Sondaı-aq, turmystyq zorlyq-zombylyq isi boıynsha otbasylardyń 43%-y sotta tatýlasady.