Ár qoıshyǵa úı berilgen, Wi-Fi ornatylǵan: Áýlıeatadaǵy kásipker jumys ornyn kóbeıtýdi josparlap otyr

JAMBYL OBLYSY. QazAqparat - Búginde Jambyl oblysynda mal ósirýmen aınalysatyn eń iri qojalyqtardyń biri - «Tabys» sharýa qojalyǵy. Qojalyq Talas aýdanynda ornalasqan. Sharýashylyq ıesi Narıman Máýlenov bul kásippen 2018-shi jyldan beri aınalysyp keledi.

Araǵa eki jyl salyp (2020 jyly) kásibin keńeıtý maqsatynda «Agrarlyq nesıe korporatsııasy» AQ Jambyl oblys boıynsha fılıaly arqyly 165 mln teńge nesıege alǵan. Sol qarajatqa 3 myń bas asyl tuqymdy (júndi quıryqty) qoı men qajetti tehnıkalar satyp alǵan.

Satyp alǵan úsh myń bas qoıdyń basyn qoldan uryqtandyrý arqyly 8 myńǵa deıin jetkizgen. Qazir mal jaıylatyn jerdiń jalpy aýmaǵy - 21 myń gektar. Qoıdy sýǵarý yńǵaıly ári jyldam bolý úshin qudyq qasyna motor ornatylǵan.

Qojalyq ıesi Narıman Máýlenovtyń basty maqsaty - Elbasy usynǵan «Týǵan jerge týyńdy tik» baǵdarlamasyn qoldap, jergilikti turǵyndardy jumyspen qamtý. Qazir sharýa qojalyǵynda eńbek etip júrgen 20 jumysshy bar. Olardyń alatyn aılyq jalaqysy ortasha eseppen 150 myń teńge. Mal baǵatyn 9 qoıshynyń árqaısyna bir-bir úıden berilgen. Eki bólmeli úıde ystyq sý, dýsh, monsha jáne Wi-Fi ornatylyp, qajet jıhazdarmen jabyqtalǵan. Ondaǵy taǵy bir erekshelik - kún kózinen qýat alatyn qondyrǵylar.

Jańadan salynǵan úılerdiń aınalasynda 100 túp tal, barlyǵy 1000 aǵash otyrǵyzylǵan. Qara aǵashtarmen qatar túrli jemis aǵashtary da bar. Aldaǵy ýaqytta taǵy 1000 tal otyrǵyzý josparlanyp otyr. Sharýalardyń aıtýynsha, bul úıdiń aınalasyn kórikti etip qana qoımaı, aptap ystyqqa tórt túlik malǵa kóleńke bolady eken.

«Tabys» sharýa qojalyǵy bordaqylaý alańyn ashyp, jumys ornyn arttyrý 2022 jyldyń basty jospary retinde qarastyryp otyr. Onyń jobalyq-smetalyq qujattamasy 120 mln teńgeni quraıdy.