Ár deńgeıdegi óndiris oryndaryna tán ortaq máseleler bar - Májilis depýtaty

PAVLODAR. QazAqparat – Eldiń ár deńgeıdegi óndiris oryndaryna tán ortaq máseleler bar. Bul týraly Májilis depýtattary Dınara Shúkijanova men Dınara Naýmovanyń Pavlodar oblysyna jumys sapary barysynda aıtyldy, dep habarlaıdy QazAqparat Respublica partııasynyń baspasóz qyzmetine silteme jasap.

Óńirge sapar daıyn alıýmınıı óndirisine qajetti shıkizat shyǵaratyn eldegi jalǵyz zaýyttan bastaldy. Jylyna 1,4 mln tonna ónim shyǵarady. Sondaı-aq, bul – Pavlodardyń iri jumys berýshi kásiporyndarynyń biri. Munda 8 myńǵa jýyq adam eńbek etedi.

Búginde zaýyt ónimniń 60 paıyzy shetelge jóneltiledi. Qalǵan ónim ishki naryqta qalady. Negizgi tutynýshy – daıyn alıýmınıı óndiretin Qazaqstan elektrolız zaýyty.

Dınara Shúkijanovanyń aıtýynsha, elimizdegi ónerkásip salasynda ortaq máseleler bar.

«Óndiris oryndarynyń aldynda birdeı kedergiler týyndap otyr. Onyń qatarynda, otandyq ónimdi eksporttaý, qural-jabdyqtardy alý qıyndyǵy, kadr tapshylyǵy sııaqty máseleler bar. Bul olqylyqtardyń ornyn júıeli túrde toltyrý qajet. Mysaly, kórshiles Qytaı elinde eksport sýbsıdııalanady. Sol sebepten, bizdiń óndiris oryndardyń olarmen básekelesýi óte qıyn. Bul másele búgin at basyn burǵan «Qazaqstan alıýmınııi» zaýytyna da tán. Onymen qosa, munda qural-jabdyqtardy jańartý qajet ekeni baıqalady», - dedi ol.

Depýtattar ónerkásipke, basqa da salalarǵa qatysty júıeli máseleler Májilis minberinde kóteriletindigin aıtty.