Ár balanyń óz nesibesi bar - 38 jastaǵy kóp balaly ana

QYZYLORDA. QazAqparat - Qyzylordalyq 38 jastaǵy kóp balaly ana Jibek Jaqsybalaeva toǵyz perzent dúnıege alyp kelgen. Bıyl bul otbasy taǵy bir náreste súımekshi, dep habarlaıdy QazAqparat tilshisi.

Jibek 21 jasynda Berik Sarbasov esimdi jigitpen otaý kótergen. Sodan bergi jyldarda shýaqty shańyraqta toǵyz perzent ómir esigin ashty. Ol «Altyn alqa» ıegeri ataǵyna 28 jasynda ıe bolǵan. Sol joly egiz qyz bosanǵan edi.

Búginde otbasynyń úlkeni Arýjan pedagogıkalyq kolledjdiń úshinshi kýrsynda grantpen bilim alyp jatyr. Ekinshi perzenti - uly Damır estııar jasqa kelip qaldy, jergilikti «Ulaǵat» kolledjiniń birinshi kýrsynda oqıdy.

Balalardyń aldy kolledjde bilim alyp jatsa, altaýy mektepte. Kishkentaıy Ámınanyń jasy - úshte, balabaqshada tálim alyp júr.

«Men Qorqyt ata atyndaǵy Qyzylorda ýnıversıtetinde «munaı-gaz» mamandyǵy boıynsha bilim aldym. Turmysqa shyqqannan keıin balalardyń tárbıesine kóńil bólgendi jón sanadym. Perzentterimniń arasy - 1-1,5 jyl. Bala tárbıesi - úlken jaýapkershilik. Qazir úıde balalaryma qaraımyn», - deıdi ol.

Joldasy Berik qurylys salasynda eńbek etedi. Qoly qalt etse, balalardyń sabaǵyna kómektesip, kerek-jaraǵyn túgendeıdi.

Jibek alǵashqyda qıyn bolǵanyn aıtady. Bir-birimen teteles óskendikten olarǵa qaraýǵa úlgermeı jatatyn. Keıin úlkenderi eseıip, bir-birine qol ushyn soza alatyn jaǵdaıǵa jetken.

Jibektiń ózi de kóp balaly otbasynda ósken. Anasy 19 qursaq kótergen Batyr ana. Ózi de kóp balaly bolǵanyn qalaǵan.

«Ár balanyń óz nesibesi bar. Memleket tarapynan túrli járdemaqy beriledi. Jergilikti basshylyq tarapynan basqa da qoldaýlar bar. Halqymyzda «Bir qozy týsa, bir túp jýsan artyq shyǵady» degen sóz bar. Sondyqtan kóp balaly bolǵan artyq emes», - deıdi Jibek.

Bul otbasy birneshe jyl buryn turǵyn úı kezegine tirkelgen edi. Bıyl baspanaly bolatyny jóninde qýanyshty habar kelip jetti.

Budan buryn Qyzylordada traktor tizgindegen jetpis jastaǵy ana týraly habarlaǵan edik.