Qamqorlyǵymyzǵa alý úshin 9 aı júgirdik — jetim egizderdi baýyryna basqan otbasy
Olardyń arasynda almatylyq erli-zaıypty Baqytjan men Arzygúl Ábdirahmanovtar da bar. Olar jetim qalǵan egiz jasóspirimdi baýyryna basqan. Kazinform agenttiginiń tilshileri qamqor ári keń júrekti otbasymen tildesip kórdi.
Jetim qalǵan egiz jasóspirimdi baýyryna basqan almatylyq erli-zaıypty Baqytjan men Arzygúldiń aıtýynsha, Bogdan men Danııldiń anasyn aqtyq saparǵa ózderi shyǵaryp salǵan.
— Bogdan men Danııl meniń ekinshi ulym — Samırjanmen bir synypta oqyǵan, ıaǵnı synyptasy. Bizde ata-analardyń WhatsApp chaty bar. Bir kúni sol jerde egiz balanyń anasy qaıtys bolǵany týraly estidik. Balalardyń Almatyda eshkimi joq eken. Ákeleri de ómirden erte ozypty. Sol sátte biz ata-analarmen birigip múmkindigimizshe tez arada aqsha jınaý týraly sheshim qabyldadyq. Meniń Instagram paraqshamda 5 myńnan astam jazylýshym bar. Men sol jerde uldardyń anasyn jerleýge aqsha kerek ekenin aıttym. Osylaısha, qos jigittiń anasyn óz dástúrlerine, dinı senimine saı jerledik, — deıdi Arzygúl.
Ábdirahmanovtar otbasy kishkentaıynan ákesinen, eseıe kele anasynan aıyrylyp, tul jetim qalǵan egizdiń barar jeri, basar taýy qalmaǵan soń balalardy asyrap alý týraly sheshim qabyldaǵan.
— Kúıeýim qala syrtynda edi, oǵan telefon arqyly habarlasyp balalar anasynan aıyrylyp qalǵanyn aıttym. Joldasym birden úıge alyp kel dedi. Bizdiń ata-anamyzda qarsy bolmady. Bogdan men Danııldi úıge ákelip, jyly sózimizdi aıtyp, olarǵa barynsha qamqor bolatynymyzdy jetkizdik. Al, kelesi kúni olardy kámeletke tolmaǵandardy beıimdeý ortalyǵyna alyp ketti, — dedi ol.
Baqytjan men Arzygúl balalardy óz qamqorlyqtaryna alý úshin 9 aı júgirgen. Tipti, patronat mektebinde dáris alyp, synaq tapsyrǵan.
— Eń aldymen qorǵanshylyq/qamqorshylyq organyna baryp, qandaı qujattar kerek ekenin anyqtap, jınaı bastadym. Shynymdy aıtaıyn ońaı bolǵan joq. Biz toǵyz aı júgirdik, kúıeýimmen patronat mektebinde oqydyq, tipti emtıhan tapsyrdyq. Óıtkeni, birinshi sot otyrysynda balalardy berýge bas tartty. Alaıda, úmitimizdi úzbedik, bárin qaıta bastadyq. Árbir bala tolyqqandy otbasynda ómir súrýge quqyly dep oılaımyn. Shyn júrekten sol balalardy qalaǵandyqtan, maqsatymyzǵa jettik, — deıdi otanasy.
Memleket eki balaǵa 72 myń teńge tóleıdi.
— Bizdiń jasymyz 40-ta. Otbasyn qurǵanymyzǵa bıyl 20 jyl toldy. Ózimizdiń úsh balamyz bar. Amır, Samır jáne Safıra. Úlken ulymyz — 19 jasta. Ortanshysy 17-de, kenjemiz 14-ke toldy. Qos qulynymyz Bogdan men Danııl jaqynda 18 jasqa tolady. Memleket eki balaǵa 68 000 teńge tólegen, qazir 72 myńǵa kóterildi, — deıdi egiz jasóspirimdi baýyryna basqan ana.
Bala baǵyp aldym dep bógdege alaqan jaıý, áldeqaıdan kómek kútý Baqytjan men Arzygúl úshin múlde jat dúnıe.
— Ár bala ómirge kelgende óziniń nesibesin ala keledi. Ol nesibe ata-ananyń eńbegine baılaýly. Kúıeýim ekeýmizdiń jeke shaǵyn azyq-túlik dúkenimiz bar. Sonymen qatar, meniń onlaın aıaq kıim men kıim dúkenim bar. Shúkir, tabysymyz jetkilikti. Bogdan men Danııl Allanyń bizge jibergen amanaty. Al amanatqa, qııanat jasaýǵa bolmaıdy. Egizder kolledjde bilim alyp jatyr. Ekeýi de grantta oqıdy, — dep atap ótti ol.
Baqytjannyń aıtýynsha, ul tárbıesinde ákeniń róli zor. Ul bala ákeniń mysalymen ósedi. Sonyń boıyndaǵy qasıetterden nár alady. Sol arqyly tulǵa bolyp qalyptasady.
— Áke — ul úshin eń qymbat jan. Eń bıik shyń. Eń asqaq asqar. Ózimniń eki ulym bar. Olardyń qataryna taǵy eki ul bala qosyldy. Olardyń tárbıesinde meniń úlesim basym bolýy kerek. Ul ákege eliktep ósedi. Balalarymdy barynsha eńbekke baýlyp júrmin. Úıde qandaı jumys istesem de qasymda júredi. Kólik jóndesem de, aýlany tazalasam da kómektesedi, — deıdi ákesi.
Sondaı-aq, ol egizderdiń minezi eki túrli ekenin atap ótti.
— Bogdanyń minezi ashyq-jarqyn, aqkónil, armanshyl, kópshil, adamdarmen tez til tabysyp ketedi. Únemi kúlip júredi. Al, Danııl bolsa, salmaqty, parasatty, tomaǵa tuıyq bala, — deıdi Baqytjan.
Jetim qalǵan qos jetkinshekti baýyryna basqan erli-zaıypty aldaǵy ýaqytta taǵy bir qyz balany asyrap alýǵa nıetti.
— Bizdiń bir qyzymyz bar. Sondyqtan, qamqorlyǵymyzǵa qyz bala alǵymyz keledi. Oıymyzda bar. Buıyrsa, ony ýaqyt kórsetedi, — dedi Arzygúl.
Aǵaıyndy Bogdan men Danııldyń qıyn kezde qoldaý kórsetip, qamqorlyǵyna alǵan januıaǵa aıtar alǵysy sheksiz.
— Bul kisiler keremet jandar. Úlgili otbasy. Óte qamqor, júrekteri meıirimge toly adamdar. Biz alǵashqyda biraz oılandyq. Odan keıin osy januıaǵa kelemiz dep sheshim qabyldadyq. Ókinbeımiz. Ana men áke mahabbatyna bólenip júrmiz. Bul kisilerge sheksiz rızamyz. Óz balalarynan kem kórmeıdi. Barlyq jaǵdaıymyzdy jasap otyr, — deıdi aǵaıyndy Bogdan men Danııl.
Amır, Samır jáne Safıra ata-analaryn maqtan tutatyndaryn jetkizdi.
— Bizdiń ata-anamyz álemdegi eń qamqor jáne meıirimdi jandar. Osyndaı áreketke barǵanyna qýanyshtymyz jáne maqtan tutamyz. Bizge taǵy eki baýyr syılaǵanyna raqmet, — deıdi olar.
Jurtshylyqtyń ystyq yqylasyna bólengen otbasy «Jaqsy adam-2024» arnaıy syılyǵynyń ıegeri atanǵandaryna qýanyshty.
— «Jibek joly» telearnasynyń basshylyǵyna jáne «Jaqsy adam» baıqaýyn uıymdastyrǵan adamdarǵa kóp raqmet. Kóptegen jaqsy jannyń ishinen bizdiń januıamyzdy tańdap alǵandaryna qýanyshtymyz. Biz mundaı marapat kútken joq edik, — deıdi Baqytjan men Arzygúl.
Eske salaıyq, osy jyldyń basynda Baqytjan men Arzygúl Ábdirahmanovtar asyrap alǵan Bogdan men Danııldyń jańa otbasyndaǵy alǵashqy týǵan kúni túsirilgen vıdeony jelige júktelip, kóptiń júregin eljiretken edi.
@arzyla777 #alhamdýlıllah #prıemnyerodıtelı #detıetoschaste #nashabolshaıasemıa❤️ #😘🥰 ♬ orıgınalnyı zvýk — Almax_shop
Aıta keteıik, 12 jeltoqsan kúni Astanadaǵy Beıbitshilik jáne kelisim saraıynda «Jaqsy adam-2024» arnaıy syılyǵynyń saltanatty marapattaý rásimi ótken bolatyn.