Ár balaǵa - 21 myń teńge: Kópbalaly otbasy ákimdikke ótinish qaldyrýy tıis

ASTANA. QazAqparat - QR Eńbek jáne xalyqty áleýmettik qorǵaý vıtse-mınıstri Svetlana Jaqypova 1 sáýirden bastap ataýly áleýmettik kómektiń jańa túrin tóleýge daıyndyq sharalary týraly aıtyp berdi. Prezıdenttiń tapsyrmasy boıynsha árbir balaǵa 21 myń teńgelik járdemaqy kelesi aıdan bastap tólenýi kerek, dep xabarlaıdy QazAqparat tilshisi.

Vıtse-mınıstrdiń aıtýynsha, ataýly áleýmettik kómek elektrondy qujattardyń negizinde taǵaıyndalady. Sol sebepti kópbalaly otbasylarǵa qujat jınap, ary-beri shapqylaýdyń qajeti joq.

«Al belgili bir otbasynyń qujattary aqparattyq bazada bolmasa, qujat jınaýǵa aýyl ákimi men jumyspen qamtý ortalyǵynyń mamandary jaýapty bolady. Búginde mınıstrlik ákimderge aqparattyq júıelerge kirýge múmkindik jasap jatyr. Olar suraýdy elektrondy túrde joldap, tıisti qujattardy jınaı alady. Búginde 1 405 aýyldyq okrýg aqparattyq júıelerge qosyldy. Jaqyn arada taǵy 1 000-ǵa jýyq aýylǵa osyndaı múmkindik beriledi», - dedi S.Jaqypova jýrnalısterge bergen suxbatynda.

Onyń sózine qaraǵanda, kópbalaly otbasy tek ákimdikke baryp, ótinish tapsyryp ketýi kerek.

«Máselen, otaǵasy ákimge baryp, ótinish jazady. Sonda otbasy músheleriniń JSN-dary (jeke sáıkestendirý nómirleri - avt.) men aty-jónderin kórsetý kerek. Tek sol ótinish qana. Qalǵan qujattardy jergilikti atqarýshy organdar men jumyspen qamtý ortalyqtary elektrondy túrde aqparattyq júıelerden, basqa memlekettik organdardyń resýrstarynan ózderi jınaıdy. Negizi, 1-inen bastap tek qujattardy ǵana qabyldaıdy. Sáýir boıy taǵaıyndaý júredi. Ataýly áleýmettik kómek qujat qabyldanǵan kúnnen bastap tólenetin bolady. Sosyn buryn kópbalaly otbasylar toqsan saıyn óz tabystaryn rastap otyratyn. Endi, atalǵan kezeń jartyjylǵa deıin uzartylady. Onyń ózi aqparattyq júıeler arqyly tekseriledi», - dep atap kórsetti S.Jaqypova.

Vıtse-mınıstri 21 myń teńgelik járdemaqyny taǵaıyndaý kezinde jeke sharýashylyqty esepke alýǵa qatysty pikir bildirdi.

Eske sala ketsek, «Nur Otan» partııasynyń XVIII sezinde QR Prezıdenti Nursultan Nazarbaev kópbalaly otbasylarda árbir balanyń tólemaqysyn 21 myń teńgege deıin arttyrýdy tapsyrǵan bolatyn.

«Úkimetke áleýmettik jaǵynan az qamtylǵan azamattardy, ásirese, kópbalaly otbasylardy qoldaý sharalaryn keńeıtýdi tapsyramyn. Atalǵan kórsetkishti kúnkóris deńgeıiniń 70 paıyzyna deıin jetkizýimiz kerek. Al ataýly kómek alyp otyrǵan kópbalaly otbasylardyń árbir balasyna beriletin járdemaqyny 21 myń teńgege deıin ósirýdi tapsyramyn. Atalǵan kómekti barynsha jeńildetý kerek. Halyq ary-beri shapqylap júrmesin. Sosyn ondaı otbasylardyń tabysyn eseptegende basqa áleýmettik járdemaqylardy sanaýdy alyp tastaý qajet. Áıtpese, sonyń bárin sanaǵanda kópbalaly otbasylar jaǵdaı jaqsy azamattar bolyp shyǵa keledi», - dedi N.Nazarbaev.
Jaqynda Memleket basshysy atalǵan sharalardy 1 sáýirden bastaýdy mindettedi.
Aıta keterligi, buǵan deıin QazAqparat tilshisi atalǵan járdemaqyny taǵaıyndaýdyń tártibin saraptap shyqqan bolatyn.