Ár azamat jetistikti memleketten emes, ózinen kútýi tıis - QR Prezıdenti janyndaǵy Memlekettik basqarý akademııasynyń vıtse-rektory L. Nurqatova

ASTANA. QazAqparat - Búgin elordada «Máńgilik el qazaqstandyq qundylyqtar júıesi» taqyrybyndaǵy áleýmettanýshylar men saıasattanýshylardyń Astana sarapshylyq forýmy ótýde.

Shara barysynda sóz alǵan QR Prezıdenti janyndaǵy Memlekettik basqarý akademııasynyń oqý jumysy jónindegi vıtse-rektory Lázzat Nurqatovanyń aıtýynsha, adal ári sapaly eńbek etý ǵylym men tehnıkaǵa, jańa tehnologııaǵa negizdelgen básekege qabiletti qazaqstandyq ónim shyǵarýmen tyǵyz baılanysty. «Bul degenimiz ár qazaqstandyq óziniń mańdaı terimen tapqan aqshasyna úı salyp, kólik alyp, tabysty jumysta eńbek etýi kerek. Biraq, ár azamat bul jetistikti memleketten emes, ózinen kútýi tıis», - dedi ol.

Lázzat Nurqatovanyń sózine qaraǵanda, qazaqstandyq qoǵam tutynýshy qoǵamnan ózi jasaı alýshy qoǵamǵa aınalýy kerek. Ol úshin bárin baılanystyratyn kúshti jumyldyryp, bir baǵytqa baǵyttaıtyn ulttyq ıdeıa qajet. «Atalǵan máselemen áleýmettanýshylar men saıasattanýshylar shuǵyldanbaq», - dedi rektordyń orynbasary.

Forým jumysyna júzden astam delegat qatysýda.