Ár aýyl ákimi mektep týrnıkterine ózi tartylyp kórýi kerek – ShQO basshysy

ÓSKEMEN. QazAqparat – Shyǵys Qazaqstan oblysynyń ákimi Ermek Kósherbaev aýyl ákimderine mektep aýlalaryndaǵy týrnıkke asylyp kórip, qaýipsizdigin tekserýdi tapsyrdy, dep habarlaıdy QazAqparat tilshisi.

ShQO ákimdiginde ótken jınalys barysynda aımaq basshysy Ermek Kósherbaev mektepterdegi balalardyń qaýipsizdigi árqashan basty nazarda bolýy kerektigin jetkizdi. Zaısan aýdanynyń ákimine «Qansha mektepti tekserdińiz, ózińiz týrnıkke shyǵyp kórdińiz be?» dep surady. Jóndi jaýap ala almaǵannan keıin aýdandardaǵy árbir mektep stadıonynyń qaýipsizdigin jeke tekseretindigin aıtty.

«Ózim mektepke baryp tekserip, eger bir kemshilik anyqtasam jýrnalısterdi shaqyryp, kórsetip, «Osy ákim balalardyń qaýipsizdigin oılamaıdy» dep aıtamyn. Sosyn saılaýǵa qalaı túsesizder!? Sol úshin aýyl ákimderi ár mekteptegi týrnıkke ózderi shyǵyp, tekserýi, jaǵdaıdy óz baqylaýynda ustaýy kerek», - dedi ákim.

Jalpy Shyǵys Qazaqstan oblysyndaǵy 343 mektep 1 qyrkúıekte 98 myńnan astam oqýshyny qabyldaıdy. Olardyń 9 654-i birinshi synyp oqýshylary.

Eske salaıyq, tamyz aıynyń basynda Astana qalasyndaǵy mektep aýmaǵynda 10 jasar balanyń ústine fýtbol qaqpasy qulap ketken bolatyn. Bala kóz jumyp, tergeý bastaldy.