Ár adam óz eliniń patrıoty – Bıbigúl Tólegenova
«Búgin – referendým kúni. Jaýapty sát. Ár adam – óz eliniń patrıoty. Barsha qazaqstandyq tańdaýyn jasap jatyr. Qazaqstan – úzdik memleketter qatarynda. Árdaıym solaı bolady dep oılaımyn», - dedi Bıbigúl Tólegenova.
Aıta keteıik, Almatyda jalpy halyqtyq referendýmda daýys berý 624 ýchaskede júrip jatyr. Onyń 549-y azamattardy turaqty tirkeý oryndary boıynsha bolsa, al 75-i – aýrýhanalar, sanatorııler jáne áskerı bólimder sııaqty ýaqytsha ornalasqan oryndar.
Sondaı-aq 172 ýchaskede tirkeýdi tekserý servısteri ornatylady. Olar daýys berýshiler ózin tiziminen tappaǵan jaǵdaıda qoldanylady.
Megapolıste 1,2 mln astam adam daýys berýge quqyly.
Osyǵan deıin Almaty ákimi Erbolat Dosaevtyń jubaıymen birge daýys berý ornyna kelgeni týraly jazǵan edik.
Eske salaıyq, búgin qazaqstandyqtar atom elektr stantsııasyn salý máselesi boıynsha jalpyulttyq referendýmda daýys beredi.
Respýblıkalyq referendým bıýlleteninde bir ǵana saýal bolady: Siz Qazaqstanda atom elektr stantsııasyn salýǵa kelisesiz be? Daýys berýshi jaýaptyń eki nusqasynyń birin tańdaıdy: «Iá, kelisemin» nemese, «Joq, kelispeımin».
Ózderiniń konstıtýtsııalyq quqyǵyn Koreıa Respýblıkasyndaǵy Qazaqstan azamattary alǵashqylardyń biri bolyp júzege asyrdy.