Ár adam óz balasy úshin jaýapty, memleketke ysyra salýǵa bolmaıdy - 12 balanyń anasy
«Prezıdenttiń Ulttyq qordyń jyl saıynǵy ınvestıtsııalyq kirisiniń 50 paıyzy esebinen balalarǵa 18 jasqa tolǵanǵa deıin arnaıy jınaqtaý shottaryn ashý usynysyn men tek kópbalaly ana retinde ǵana emes, sondaı-aq turmystyq zorlyq-zombylyqqa ushyraǵan áıelderge quqyqtyq jáne psıhologııalyq qoldaý kórsetip kele jatqan maman retinde de joǵary baǵaladym. Bul – memlekettiń óskeleń urpaqqa degen zor qoldaýy men qamqorlyǵy», - deıdi ol.
Sonymen birge, ol sábı kútimi boıynsha tólemder merzimin uzartý máselesi – ana men balany qoldaý baǵytyndaǵy ilgerileý nyshany dep qabyldaıdy.
«Memleket basshysy bala bir jasqa tolǵansha tólenetin járdemaqyny 1,5 jylǵa deıin uzartýdy tapsyrdy. Bul árıne, dekrettegi ana úshin óte jaǵymdy jańalyq. Degenmen, osy jerde bir aıta keterligi, bizdiń elimizde balany eki jasqa deıin qabyldaıtyn balabaqshalar joqtyń qasy. Sondyqtan, balasy 1,5 jasqa tolǵan analardyń birden jumysqa shyǵyp ketýi ekitalaı. Birinshiden, balasy kishkentaı anany eshkim jumysqa alǵysy kelmeıdi. Ekinshiden, jas bala aýrýshań keledi, sábıi jıi naýqastana bergen ana durys jumys istep jarytpaıdy. Aldaǵy ýaqytta osy másele de eskerilse eken, ıaǵnı tym bolmaǵanda 2 jasqa tolǵansha járdemaqy tólense artyq bolmaıdy dep esepteımin. Árıne, memlekettiń múmkindigi barlyǵyna birdeı jete bermeıtinin bilemiz. Degenmen, «Jańa Qazaqstanda» bul máseleler oń sheshiledi dep senimmen aıta alamyn. Eń bastysy, alǵashqy mańyzdy qadam jasaldy. Muny Prezıdent Joldaýynda aıtylǵan mindetterden ańǵarýǵa bolady», - dep qosty kópbalaly ana.
Quralaı Jumabekova – «Kúmis alqa» ıegeri, ol alty balany dúnıege ákelip, taǵy alty balany baýyryna basqan. Qoǵamdyq jumystarǵa da belsendi aralasady. Búgingi kúni ol jetekshilik etip otyrǵan «Ana úıi» resýrstyq ortalyǵy men «Demeý senim» qoǵamdyq qory turmystyq zorlyq-zombylyqqa ushyraǵan áıelderge quqyqtyq jáne psıhologııalyq qoldaý kórsetedi. Onyń sózinshe, áıelderdiń áleýmettik, turmystyq jaǵdaıyn sheshýde áli de birqatar másele bar.
«Túrli jaǵdaımen túsken jas analar turmystyq jaǵdaılaryn jaqsartyp alǵansha, alty aıǵa deıin «Ana úıi» resýrstyq ortalyǵynda bolady. Olardyń munda kelýine san túrli sebep bar. Máselen, erte júktilik máselesi, bul rette qyz balaǵa ǵana kiná artqan durys emes. Nárestesin qushaqtap jalǵyz qalatyn jas analar qoldaýǵa zárý. Bala taǵdyrymen oınaýǵa bolmaıdy. Ár adam óz balasy úshin jaýapty. Sol sebepti, bul máseleni memleketke ysyra salmaý kerek. Jaqynda bir otbasy ortalyqqa kelip, nemerelerimen qaýyshty.
Bizge turmystyq zorlyq-zombylyqtan japa shekken áıelder de kómek surap keledi. Osy jyldar ishinde ortalyqta turyp, mamandyq alyp, jumysqa ornalasqan analar kóptep sanalady. Olarǵa qoldan kelgenshe kómek kórsetemiz. Ortalyqta turý tegin. Azyq-túlik, kıim-keshekpen qamtamasyz etilgen. Qazirgi ýaqytta bes jas ana turyp jatyr. Barlyǵy jumys isteıdi. Ortalyqta turǵan jarty jyl ishinde qarajat jınap, turmystaryn túzeýge múmkindik bar. Eń qıyny – baspana. Qalada páter jaldap turý óte qymbat. Jas analardyń kóbiniń mamandyǵy joq. Eden jýýshy, sanıtar jalaqysymen páter jaldap, kún kórý múmkin emes. Osy másele boıynsha jergilikti ákimdikke áleýmettik jaǵdaıy tómen jandarǵa arnap jataqhana salý jóninde usynys bildirdik. Joldaýda aıtylǵandaı, endigi arada memlekettik organdar jumysyn jaqsartyp, nátıjesin arttyrýy tıis. Sonda osy aıtylǵan máseleler birtindep sheshiletin bolady», - dep túıindedi kópbalaly ana.
Aıta ketsek, budan buryn jumys istemeıtin ata-analar úshin de bala kútiminiń áleýmettik tólemi 1,5 jylǵa uzartylatynyn jazǵan edik.